25 sentyabr tarixində Azərbaycanda ilk dəfə Beynəlxalq Kiberdiplomatiya Konfransı baş tutacaq. Bu tədbir regionda kiberdiplomatiya mövzusunda keçirilən ilk beynəlxalq konfransdır və texnologiyalarla diplomatiyanın vəhdətini əks etdirir.
Müasir dövrdə texnologiyaların sürətli inkişafı ilə diplomatiya sahəsi də yenidən formalaşır. Kiberdiplomatiyanın meydana çıxması beynəlxalq münasibətlərə həm yeni imkanlar, həm də ciddi çağırışlar gətirir. Bu yeni sahə dövlətlər arasında əlaqələrin və müzakirələrin kiber məkana inteqrasiyasını zəruri edir, eləcə də təhlükəsizlik, məxfilik və texnoloji tərəqqi ilə bağlı məsələlərin həlli üçün mühüm əhəmiyyət daşıyır.
Tədbirin təşkilatçısı Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidməti olacaq. Konfransda yerli və beynəlxalq səviyyəli yüksək vəzifəli şəxslər məruzələr edəcək və çıxışlar həyata keçirəcəklər. Konfrans iştirakçıları beynəlxalq kibertəhlükəsizlik, rəqəmsal diplomatiya və texnoloji yeniliklər sahəsində müzakirələr aparacaqlar.
Konfrans 25 sentyabr saat 09:00-da Bakıdakı Fairmont otelində (Alov Qüllələri) baş tutacaq. Bu tədbir Azərbaycanın beynəlxalq arenada kibertəhlükəsizlik və kiberdiplomatiya sahəsində rolunu möhkəmləndirmək məqsədi daşıyır və iştirakçılar arasında geniş fikir mübadiləsinə şərait yaradacaq.
Daha ətraflı məlumatı tədbirin rəsmi səhifəsində əldə etmək mümkündür.
