Bakıda, “Nizami” kinoteatrında Şərqin ilk qadın təyyarəçisi olan Leyla Məmmədbəyova haqqında çəkilmiş “Səma Xanımı” filminin təqdimatı keçirildi. Leyla Məmmədbəyova cəsarət və müstəqilliyin rəmzi olaraq təsvir olunub. Filmin rejissoru Elvin Əhmədoğlu qəhrəmanını belə xarakterizə edib: “Öz dövrünün küləyinə qarşı uçan qadın.”
“Səma Xanımı” adlı 30 dəqiqəlik qısametrajlı film, Azərbaycan Televiziyası (AZTV), Azərbaycan Hava Yolları (AZAL) və Ailə, Qadın və Uşaq Problemləri üzrə Dövlət Komitəsinin dəstəyi ilə ərsəyə gəlib.
Rejissorun Rəyi
Filmin rejissoru Elvin Əhmədoğlu təqdimat zamanı Leyla Məmmədbəyovanın həyatı ilə bağlı fikirlərini bölüşərək bildirib:
“Belə görkəmli şəxsiyyət haqqında tammetrajlı serial çəkmək lazım idi. Onun həyatı parlaq anlarla dolu olub. Leyla xanım XX əsrin 20-30-cu illərində bütün Şərq və Qafqazda ilk qadın təyyarəçi kimi tarixə düşüb. Bu, qadınların böyük əksəriyyətinin çadra geyindiyi və təyyarəçi peşəsinin əlçatmaz olduğu bir dövr idi. Hətta bu barədə xəyal qurmaq belə mümkünsüz idi.”
