Bu gün Ümummilli Lider Heydər Əliyevin vəfatının 21-ci ildönümüdür.
Heydər Əliyevin Həyatı və Fəaliyyəti
Heydər Əlirza oğlu Əliyev 1923-cü il mayın 10-da Naxçıvan şəhərində anadan olub. 1944-cü ildə dövlət təhlükəsizliyi orqanlarında çalışmağa başlayıb. 1967-ci ildə Azərbaycan SSR Nazirlər Soveti yanında Dövlət Təhlükəsizliyi Komitəsinin sədri vəzifəsinə təyin edilib. Bu dövrdə Leninqradda xüsusi ali təhsil almış və 1957-ci ildə Azərbaycan Dövlət Universitetinin tarix fakültəsini bitirmişdir.
1969-cu ildə Heydər Əliyev Azərbaycan KP MK-nın birinci katibi seçilmiş və Azərbaycan SSR-ə rəhbərlik etməyə başlamışdır. 1982-ci ildə SSRİ Nazirlər Soveti sədrinin birinci müavini vəzifəsinə təyin olunaraq SSRİ rəhbərliyində yüksək mövqeyə yüksəlmişdir.
1987-ci ilin oktyabrında SSRİ rəhbərliyinin siyasətinə etiraz olaraq vəzifəsindən istefa verib. 1990-cı ilin yanvarında Bakıda baş verən qanlı hadisələrlə bağlı Moskvadakı Azərbaycan nümayəndəliyində bəyanat verərək sovet ordusunun xalqımıza qarşı törətdiyi cinayətin təşkilatçılarının cəzalandırılmasını tələb edib.
1991-1993-cü illərdə Heydər Əliyev Naxçıvan Muxtar Respublikası Ali Məclisinin sədri vəzifəsində çalışmışdır. 1992-ci ildə “Yeni Azərbaycan” Partiyasının təsis qurultayında partiyanın sədri seçilmişdir.
1993-cü il iyunun 15-də Azərbaycan Ali Sovetinin sədri seçilən Heydər Əliyev, 3 oktyabr 1993-cü ildə ümumxalq seçkilərində Azərbaycanın prezidenti seçilmişdir. 1998-ci ildə yenidən prezident seçilən Heydər Əliyev 2003-cü ildə səhhətində yaranan problemlər səbəbindən seçkilərdə iştirak etməmişdir.
Heydər Əliyev 2003-cü il dekabrın 12-də ABŞ-ın Klivlend şəhərindəki klinikada vəfat etmişdir. Onun məzarı Fəxri xiyabanda yerləşir.
