Məşhur amerikalı aktrisa Megan Fox yaxın zamanda dördüncü dəfə ana olacaq. O, 34 yaşlı sevgilisi, amerikalı reper Machine Gun Kelly (Kolson Beyker) ilə övlad sahibi olacaq. Cütlüyün ailəsinə nə vaxt yeni üzv qatılacağı məlum olub.
Hollivud ulduzu hamiləliyini 12 noyabrda Instagram-da elan edib. Fox-un paylaşdığı fotoda onun yuvarlaqlaşmış qarını diqqət çəkir. Aktrisa hamiləliyi ilə bağlı əlavə məlumat verməyib.
TMZ-yə danışan insayderlər Fox-un hazırda hamiləliyin 4-5-ci ayında olduğunu bildirib. Uşağın gələn ilin yazında dünyaya gəlməsi gözlənilir. Cütlük övladlarının cinsiyyətini artıq öyrənsə də, bunu hələ ki gizli saxlayır.
Mənbələr Fox-un özünü yaxşı hiss etdiyini və hamiləliyin heç bir çətinlik olmadan davam etdiyini qeyd edib. Bu uşaq aktrisa üçün dördüncü övlad olacaq, o, Braayan Ostin Qrindən olan üç oğul övladını tərbiyə edir. Beyker üçün isə bu, ikinci uşaq olacaq; onun artıq Keisi adlı bir qızı var.
Megan Fox haqqında nə bilirik?
Fox-un karyerası yeniyetmə yaşlarından başlayıb, ilk dəfə televiziyada seriallarda çıxış edib. 2000-ci illərin əvvəllərində isə model və aktrisa kimi tanınıb.
2007-ci ildə “Transformerlər” filmindəki Mikaela Beyns rolu ilə məşhurlaşıb. Bu filmdən sonra onun karyerasında “Cenniferin bədəni” (2009), “Ninja Tısbağalar” (2014) və “Diktator” (2012) kimi layihələr yer alıb.
