Rusiya şirkətləri Azərbaycanın Qarabağ bölgəsinin bərpası prosesində əməkdaşlığa maraq göstərirlər.
Bu barədə Rusiyanın Azərbaycandakı səfiri Mixail Evdokimov Kəlbəcər rayonuna səfəri zamanı bildirib.
Səfir qeyd edib ki, Rusiyanın “Abrau-Dyurso” şirkətlər qrupu Qarabağla maraqlanır: “Məlumdur ki, şirkətin prezidenti Pavel Titov bu ərazilərə bir neçə dəfə səfər edib və ölkəmizdə məşhur olan “Ağdam” brendini genişləndirmək üçün istifadə oluna biləcək üzüm bağlarına baxış keçirib. Bundan əlavə, tikinti materialları istehsalı ilə məşğul olan bir çox Rusiya şirkəti də işğaldan azad edilmiş ərazilərdə fəaliyyət göstərməkdə maraqlıdır.”
Diplomat Qarabağda görülən genişmiqyaslı tikinti və bərpa işlərindən heyranlığını ifadə edib, Azərbaycan Respublikasında diplomatik missiyasına başladığı andan etibarən Qarabağa artıq dördüncü dəfə səfər etdiyini vurğulayıb.
“O, diplomatik missiyasına keçən ilin iyul ayında başlamışdır. Mənim Füzuli, Laçın, Şuşa və bu gözəl məkan [Sərsəng su anbarı] kimi ərazilərə səfər etmək şansım oldu. Dəyişikliklər təəccübləndiricidir. Prezident İlham Əliyevin rəhbərliyi altında Azərbaycanın Qarabağ bölgəsini bərpa etmək üçün göstərdiyi bütün səylər göz önündədir. Azərbaycanın vətəndaşlarına, xüsusilə tarixi Vətəninə qayıdanlara uğurlar arzulayıram,” – deyə səfir vurğulayıb.
Qeyd edək ki, Azərbaycanda akkreditə olunmuş diplomatlar, o cümlədən hərbi attaşelər və beynəlxalq təşkilatların rəhbərlərindən ibarət nümayəndə heyəti bu gün Kəlbəcər rayonuna səfər edib.
Səfər çərçivəsində xarici qonaqlar Suqovuşan və Sərsəng su anbarlarına baş çəkiblər. Onlar həmçinin “Yuxarı Vənq” su elektrik stansiyasına, Kəlbəcər şəhərindəki yaşayış binalarına, orta məktəbə, “İstisu” mineral su zavoduna və digər ərazilərə də baş çəkəcəklər.
