BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası (COP29) qlobal səviyyədə böyük əhəmiyyət daşıyan bir tədbirdir. Bu il konfransın Bakıda keçirilməsi Azərbaycanın qlobal iqlim tarazlığının qorunması üzrə mühüm uğurlar əldə etdiyini sübut edir.
Bu barədə Daylinews-az-a Moldovanın Ukraynadakı səfiri Valeriu Kiver məlumat verib.
Moldovalı diplomat bildirib: “Bu il bir çox dövlət başçılarının və ölkələrin ətraf mühit nazirlərinin Bakıya toplaşaraq bu mövzunu müzakirə etməsi Azərbaycanın dünya səviyyəsində qazandığı nüfuzu bir daha təsdiq edir. Əminəm ki, ölkə rəhbərliyinin və hökumətinin səyləri sayəsində bu tədbir uğurla başa çatacaq.”
Valeriu Kiver əlavə edib ki, Azərbaycan bu mötəbər tədbirdə bütün dünyaya ölkənin doğru yolda irəlilədiyini göstərəcək. “Azərbaycanda ətraf mühitin mühafizəsi və bu sahədə həyata keçirilən tədbirlər fəal şəkildə aparılır. Bu siyasət iqlim tarazlığının qorunması sahəsində digər ölkələr üçün yaxşı bir nümunə olacaq,” – deyə Moldovanın Ukraynadakı səfiri fikrini tamamlayıb.
