Türkiyənin simulyatorlar üzrə aparıcı şirkəti Simsoft Bakıda keçiriləcək ADEX 2024 müdafiə sərgisində iştirak edəcəyini açıqlayıb. Şirkətin rəsmi sosial şəbəkə səhifəsində yayılan məlumatda, Simsoft sərgidə müdafiə, aviasiya və kosmos sahələrində tətbiq olunan yenilikçi simulyasiya texnologiyalarını təqdim edəcəyini bildirib.
Sərgidə şirkət özünün simulyasiya, oyun texnologiyaları və təlim sistemləri üzrə həllərini nümayiş etdirəcək. Simsoft 2006-cı ildə yaradılıb və əsasən müdafiə, hərbi proqram təminatı, ciddi oyun tətbiqləri və simulyasiya sistemləri üzərində ixtisaslaşıb. Şirkət qlobal səviyyədə tanınan təşkilatlarla əməkdaşlıq edərək, müxtəlif sahələrdə simulyasiya məhsulları təqdim edir.
Simsoft-un hazırladığı simulyatorlar həm milli, həm də beynəlxalq səviyyədə hərbi və mülki təşkilatlar tərəfindən istifadə olunur. Şirkət müdafiə və aviasiya sahəsində dünya səviyyəsində məşhur olan oyun tətbiqlərini inkişaf etdirməyə yönəlib. Simsoft həmçinin milli müdafiə sektorunda tədqiqat və inkişaf proqramlarına böyük töhfələr verir.
Xatırladaq ki, ADEX 2024 sərgisi 24-26 sentyabr tarixlərində Bakıda baş tutacaq. Bu beynəlxalq tədbir müdafiə sənayesinin ən vacib iştirakçılarını bir araya gətirir və hər il yeni texnologiyalar və həllərin nümayişi üçün unikal platforma təqdim edir.
