Gürcüstanın keçmiş prezidenti Salome Zourabişvili Tbilisidə keçirdiyi brifinqdə yeni ofisini təqdim edərək burada “prezident funksiyalarını” davam etdirəcəyini bəyan edib.
“Bugün sizi bu yeni ofisdə qəbul etmək istəyirəm. Bu, Orbeliani sarayının davamıdır (prezident rezidensiyası – red.). Bəlkə də, bu yer Orbeliani sarayına bənzəmir, amma onun ruhu və enerjisi buradadır və burada prezident funksiyaları davam etdiriləcək,” – deyə Zourabişvili bildirib.
Onun sözlərinə görə, ölkə dərin bir böhran içindədir və çıxış yolu təkrar parlament seçkilərinin təyin olunmasındadır. Zourabişvili qeyd edib ki, Gürcüstan əhalisi ilə görüşlərini davam etdirəcək, xüsusilə, 10 yanvar tarixində qərbdə yerləşən Zuqdidi şəhərinə səfər edəcək. “Mən prezidentəm və prezident olaraq qalacağam,” – deyə o vurğulayıb.
Zourabişvilinin ofisi Tbilisinin mərkəzində, Çovelidze küçəsində yerləşir. Brifinq zamanı onun arxasında Gürcüstan və Avropa İttifaqının bayraqları ilə yanaşı, prezident ştandartı da görünüb.
Gürcüstan parlamentində 29 dekabr tarixində altıncı prezident Mixail Kavelashvilinin andiçmə mərasimi keçirilib. O, 14 dekabrda seçici kollegiyası tərəfindən beş illik müddətə seçilib. Bu, Gürcüstanın ilk dolayı yolla keçirilən prezident seçkiləri olub. İnauqurasiya ilə paralel olaraq, Zourabişvili prezident rezidensiyasının həyətində tərəfdarları qarşısında çıxış edib və rezidensiyanı tərk etdiyini, lakin siyasi mübarizəni davam etdirəcəyini bildirib. O, 26 oktyabr tarixində keçirilən parlament seçkilərinin nəticələrini tanımadığını və özünü yeganə legitim prezident hesab etdiyini vurğulayıb.
