Azərbaycan və Özbəkistan arasında keçirilən Media Forumunda iki ölkənin media mütəxəssisləri “Rəqəmsal əsrdə həqiqət axtarışı: Dezinformasiya ilə mübarizə” mövzusunda panel müzakirəsində iştirak etdilər. Tədbirdə Özbəkistan Beynəlxalq Əlaqələr üzrə İnformasiya və Təhlil Mərkəzinin direktoru Sanjar Vəliyev hər iki ölkənin media sahəsində qarşılıqlı fəaliyyətini yüksək qiymətləndirdi. O vurğuladı ki, iki ölkənin ekspertləri tez-tez televiziya və digər media platformalarında birgə çıxış edərək müxtəlif mövzularda obyektiv və qərəzsiz məlumatları ictimaiyyətə çatdırırlar.
Sanjar Vəliyev bildirdi ki, Azərbaycan və Özbəkistanın müxtəlif qurumları arasında etibarlı işgüzar əlaqələr qurulub və bu əməkdaşlıq informasiya mühitində də əks olunmaqdadır. O, hər iki ölkənin səylərinin obyektiv dərk edildiyini və bu əlaqələrin daha da inkişaf etdirilməsi üçün potensialın böyük olduğunu qeyd etdi.
Forum çərçivəsində çıxış edən “Azərbaycan Televiziya və Radio Verilişləri” QSC-nin sədri Rövşən Məmmədov isə dezinformasiyanın geosiyasi təsir vasitəsi olduğunu vurğuladı. Məmmədov xüsusilə Qarabağ münaqişəsi zamanı beynəlxalq medianın Azərbaycan haqqında təhrif olunmuş məlumatlar yayaraq ölkəmizi haqsız olaraq “təcavüzkar” kimi təqdim etdiyini nümunə kimi göstərdi. O qeyd etdi ki, 1990-cı illərin əvvəllərində Ermənistan silahlı qüvvələri tərəfindən Azərbaycan torpaqlarının işğalı zamanı dünya mediası hadisələri təhrif edərək Azərbaycanın humanitar fəlakətlərini və bir milyon insanın məcburi köçkün statusuna düşməsini düzgün işıqlandırmadı. Bunun əvəzinə Azərbaycan yanlış təqdimatlara məruz qaldı.
Rövşən Məmmədov əlavə etdi ki, dezinformasiyanın yayılmasına qarşı mübarizənin ən təsirli üsullarından biri xalqlar arasında birlik və həmrəylikdir. Bu xüsusda media orqanları arasında əməkdaşlığın gücləndirilməsi və obyektiv xəbərlərin yayılması böyük əhəmiyyət kəsb edir. Onun sözlərinə görə, dezinformasiyaya qarşı ən effektiv mübarizə yolu etibarlı və ciddi media qurumları arasında əməkdaşlıqdır.
Panel müzakirəsi çərçivəsində Özbəkistan Prezidenti Administrasiyasının İnformasiya və Kütləvi Kommunikasiya Agentliyi yanında Kütləvi Kommunikasiya məsələləri üzrə Mərkəzin rəhbəri Əkbər Rizayev də öz çıxışında beynəlxalq platformalarla, o cümlədən “Meta”, “Telegram” və “YouTube” kimi iri sosial şəbəkə şirkətləri ilə əməkdaşlıq çərçivəsində dezinformasiya və fişinq hücumlarına qarşı mübarizənin vacibliyini qeyd edib. Rizayev əlavə etdi ki, bu platformalarla vaxtaşırı əməkdaşlıq edilir və məlumatların doğruluğu təmin olunur.
Bundan əlavə, “Trend” Beynəlxalq İnformasiya Agentliyinin direktoru İlqar Hüseynov da öz çıxışında dezinformasiyaya qarşı mübarizədə peşəkar jurnalistlərin yetişdirilməsinin əhəmiyyətini vurğuladı. Hüseynov bildirdi ki, jurnalistika prestijli peşə kimi qəbul olunmalı və bu sahədə çalışan mütəxəssislər yüksək peşəkarlığa malik olmalıdırlar. Onun sözlərinə görə, məlumatlı insanların jurnalistikaya cəlb edilməsi peşəkar medianın inkişafına və dezinformasiyanın qarşısının alınmasına böyük töhfə verə bilər.
Forumun yekununda Azərbaycan və Özbəkistan arasında media əməkdaşlığının gücləndirilməsi və dezinformasiya ilə mübarizə sahəsində birgə layihələrin həyata keçirilməsi mövzusu müzakirə olundu.
