Bakıda İqlim Fəaliyyəti Həftəsi çərçivəsində beynəlxalq konfrans işə başlayıb.
Daylinews-az.com-ın Trend-ə istinadən verdiyi məlumata görə, İqlim Fəaliyyəti Həftəsi 30 sentyabr – 4 oktyabr 2024-cü il tarixlərində keçirilir və bu tədbir Bakıda ilk dəfə təşkil olunur.
Bu tədbir, noyabr ayında Bakıda keçiriləcək COP29-a hazırlıq olaraq iqlim gündəliyinin əsasını təşkil edəcək.
İqlim Fəaliyyəti Həftəsində siyasət, maliyyə, ticarət, investisiyalar, elm, incəsənət, mədəniyyət, vətəndaş cəmiyyəti və media kimi müxtəlif sahələrdən əsas maraqlı tərəflər iştirak edəcək.
Tədbirin əsas mövzuları arasında “enerji keçidi”, “şəhərlər və urbanizasiya mühiti”, “su təhlükəsizliyi”, “ərzaq və kənd təsərrüfatı”, “kiçik və orta müəssisələr” və “yaşıl bacarıqlar” yer alır.
Həftənin ilk yarısı (30 sentyabr – 2 oktyabr) dövlət qurumları, akademik dairələr və özəl sektorun iştirak etdiyi iqlim həllərinə həsr olunacaq. Həftənin ikinci yarısında (3-4 oktyabr) elm, təhsil, incəsənət, mədəniyyət və digər sektorlar diqqət mərkəzində olacaq.
İqlim həftəsi çərçivəsində şəhərin müxtəlif yerlərində bir çox tədbir keçiriləcək.
Qeyd edək ki, COP29 bu ilin noyabrında Azərbaycanda baş tutacaq. Bu qərar keçən il Dubayda, 11 dekabr tarixində keçirilən COP28-in plenar iclasında qəbul edilib. İki həftə ərzində Bakı dünya mərkəzinə çevriləcək və təxminən 70-80 min xarici qonaq qəbul edəcək.
