Beynəlxalq maliyyə bazarlarında Bitkoinin dəyəri sürətlə artmağa davam edir. Kriptovalyuta birjası “Binance”ın məlumatına əsasən, Bitkoin tarixində ilk dəfə rekord səviyyəyə yüksələrək 93 min ABŞ dolları həddini keçib. Bu göstərici investorlar üçün yeni maraq dalğası yaradıb. Lakin bu bahalaşma Azərbaycan manatı üçün hansısa təhlükə yaradırmı?
Millət vəkili: Manatın məzənnəsinə təsir yoxdur
Daylinews-az.com-ə danışan millət vəkili Vüqar Bayramov qeyd edib ki, Bitkoinin qiymət artımı ilə yanaşı, ABŞ-da digər maliyyə göstəricilərində də yüksəlmə müşahidə olunur. Bununla belə, Bitkoinin birbaşa olaraq manatın məzənnəsinə təsir etmədiyini vurğulayıb:
“Bitkoin virtual valyutadır və dolların məzənnəsinə təsir göstərmir. Manatın məzənnəsi isə birbaşa olaraq Mərkəzi Bankın müəyyən etdiyi siyasətdən asılıdır. Bu artımlar qlobal valyuta bazarındakı dəyişikliklərin nəticəsidir və manatın məzənnəsində ciddi dalğalanmalar gözlənilmir.”
Qlobal bazarda təsirlər və gözləntilər
Vüqar Bayramov bildirib ki, yaxın gələcəkdə ABŞ iqtisadi siyasətində baş verə biləcək dəyişikliklər qlobal bazara daha real təsir göstərəcək:
“Hələlik psixoloji təsirlər qiymət və məzənnə artımlarına səbəb olub. 2025-ci ilin yanvarından sonra ABŞ-ın iqtisadi siyasəti real nəticələr verəcək və təsirlərin daha aydın şəkildə hiss olunması mümkün olacaq.”
Mərkəzi Bankın mövqeyi həlledici rol oynayır
Deputat əlavə edib ki, Mərkəzi Bank valyuta bazarındakı dəyişiklikləri yaxından izləyir və lazımi müdaxilə imkanlarına malikdir. Bu, manatın məzənnəsinin sabitliyinin qorunmasında əsas amildir.
