Azərbaycan Hava Yollarına məxsus təyyarənin Qazaxıstanın Aktau şəhərində qəzaya uğraması nəticəsində çoxsaylı insan itkisi ilə əlaqədar dünya liderləri Prezident İlham Əliyevə başsağlığı mesajları göndərməkdə davam edir.
Rusiyanın Baş Yepiskopu Sergey Ryaxovski
Rusiya Federasiyasının Baş Yepiskopu Sergey Ryaxovski Prezident İlham Əliyevə göndərdiyi məktubda dərin hüznlə başsağlığı diləklərini ifadə edib:
“Hörmətli İlham Heydər oğlu!
“Şəxsən öz adımdan və Rusiyanın Xristian İnamı Evangeliklər Birliyinin (Pentikostal) adından, Qazaxıstanın Aktau şəhəri yaxınlığında baş vermiş təyyarə qəzası nəticəsində Azərbaycan vətəndaşlarının həyatını itirməsi və ağır yaralanması ilə bağlı ən dərin hüznlə başsağlığı verirəm.
Biz inanclılar olaraq belə çətin günlərdə birliyimizin və dualarımızın gücünü hiss edirik. Biz kilsələrimizdə və evlərimizdə yaralılar üçün dua edirik. Uca Tanrıdan şəfa diləyirik. Həlak olanların yaxınlarına təsəlli və güc diləyirəm. Sizin xalqınızla birlikdəyəm və sizinlə birlikdə hüznlənirəm.”
Çexiya Prezidenti Petr Pavel
Çexiya Respublikasının Prezidenti Petr Pavel də Prezident İlham Əliyevə ünvanladığı məktubunda Azərbaycan xalqına başsağlığı verib:
“Zati-aliləri!
“Azərbaycan Hava Yollarına məxsus sərnişin təyyarəsinin qəzaya uğraması və çoxsaylı insan tələfatına səbəb olması ilə bağlı xəbəri dərindən hüznlə qarşıladım. Əminəm ki, bu dəhşətli hadisəyə gətirib çıxaran bütün səbəblər ətraflı araşdırılacaq.
Çexiya Respublikasının vətəndaşları və şəxsən öz adımdan bu kədərli anda yaxınlarını itirənlərə və Azərbaycan xalqına dərin hüznlə başsağlığı verirəm.”
