Lionel Messi və Luis Suarez, Serxio Buskets, Jordi Alba kimi məşhur futbolçular dekabrın 11-də Bakı Kristal Zalında keçiriləcək möhtəşəm tədbirdə iştirak edəcək.
Azarkeşlər Lionel Messini – dünya çempionu və səkkizqat “Qızıl top” mükafatçısını – onun komanda yoldaşları ilə birlikdə canlı izləmək fürsəti əldə edəcək. Tədbir çərçivəsində Messi haqqında sənədli film də nümayiş olunacaq. Bu film əfsanəvi futbolçunun şəxsi həyatından və idman karyerasından nadir kadrları təqdim edəcək.
Bakı Kristal Zalında keçiriləcək tədbir xüsusi musiqi proqramı ilə müşayiət olunacaq. Tanınmış bəstəkar və ifaçı Villi Uilyam və məşhur “Morandi” qrupu səhnədə çıxış edərək iştirakçılara unudulmaz anlar yaşadacaq.
Bu tədbir yalnız futbol həvəskarları üçün deyil, həm də musiqi sevərlər üçün nəzərdə tutulub. İştirakçılar həm futbolun, həm də musiqinin möhtəşəm sintezindən zövq ala biləcək.
Tədbirdən əldə olunan gəlir xeyriyyə məqsədinə yönəldiləcək.
