Minifutbol üzrə Çempionlar Liqasında çıxış edəcək “AzNur” klubunun baş məşqçisi Rəcəb Fərəczadə, komandasının hazırlıqları və qarşıdakı oyunlar haqqında İdman.biz saytına geniş müsahibə verib.
– Çempionlar Liqasına hazırlıq prosesi necə keçdi?
– Hazırlıqlarımıza təxminən bir ay əvvəl başlamışıq. Bu müddət ərzində həm fiziki, həm də taktiki məşqlərə xüsusi diqqət yetirdik. “Birbaşa Bakı” komandası ilə iki yoxlama oyunu keçirdik. Çempionlar Liqasında oynayacağımız meydanlar bizə tanış olanlardan bir qədər böyükdür, buna görə də ASK Arenanın böyük meydanında yoldaşlıq görüşləri təşkil etdik. Bu oyunlar zamanı bəzi zəif cəhətlərimizi aşkar etdik və onlar üzərində çalışdıq. Ümid edirəm ki, birinci matçımızı qələbə ilə başa vuracağıq.
– Çempionlar Liqasında C qrupunda qarşılaşacağınız komandalar haqqında nə deyə bilərsiniz?
– C qrupunda Ukraynanın “Andezit”, Polşanın “Qalport” və Fransanın “Les Piopio” komandaları ilə qarşılaşacağıq. Rəqiblərimizin hamısı güclü komandadır, amma “Les Piopio” digərləri ilə müqayisədə bir qədər zəif görünür. Buna baxmayaraq, Çempionlar Liqasında zəif rəqib olmur. Sabah Fransızlara qarşı oynayacağımız matç çox vacibdir və startda qələbə qazanmaq hədəfimizdir.
– Qrupdan çıxmaq şanslarınızı necə qiymətləndirirsiniz?
– Qrupdan çıxmaq üçün kifayət qədər şansımız var. Əsas məsələ yaratdığımız qol vəziyyətlərindən səmərəli istifadə etməkdir. Futbolçularımız fərdi bacarıqları ilə seçilir. Müdafiə xəttində və qapıda diqqətli olmalıyıq. Komanda olaraq yaxşı müdafiə olunarsaq, ilk oyunda qələbə qazana bilərik və sonra növbəti oyunlar haqqında düşünəcəyik.
– Komandanızın əsas hədəfi nədir?
– İlk növbədə, qrup mərhələsindən çıxmaq bizim əsas məqsədimizdir. Sonrakı mərhələlərdə nə qədər irəliləyə bilsək, o qədər də yaxşı olacaq.
– Heyətinizdəki problemlər və ya yeniliklər barədə nə deyə bilərsiniz?
– Hazırda məni ən çox narahat edən məsələ üç oyunçumuzun zədəli olmasıdır. Elvin, Tural və Əzizin vəziyyəti sabah məlum olacaq. Hər üçü komandamızın əsas oyunçularındandır və onların tam hazır olmalarını çox istəyirəm. Eyni zamanda, heyətimizə Əziz Hüseynov, Elməddin Hüseynzadə, təcrübəli qapıçı İlqar Abdulov, Elşən Veysəlov və Böyükağa Quliyevi əlavə etmişik.
Rəcəb Fərəczadə, komandasının qarşıdakı oyunlara yaxşı hazırlaşdığına inandığını və azarkeşlərin dəstəyi ilə uğurlu nəticələr əldə edəcəklərinə ümid etdiyini bildirdi.
