Azərbaycan dövlətinin müdafiə qabiliyyətinin gücləndirilməsi və milli təhlükəsizliyinin təmin edilməsi sahəsinə xüsusi diqqət ayırması, ölkənin bu sahədə inkişafını prioritet istiqamətlərdən birinə çevirmişdir. Son illərdə Azərbaycan müdafiə sənayesi sürətlə inkişaf edir. Həm mövcud istehsal sahələri müasir tələblərə uyğun yenilənir, həm də yeni istehsalat sahələri yaradılır. Bu islahatların nəticəsində, ölkəmizdə istehsal edilən hərbi təyinatlı məhsulların çeşidi xeyli genişlənmişdir və hal-hazırda Azərbaycanda 1000-dən çox müxtəlif adda hərbi təyinatlı məhsul istehsal edilir. Azərbaycanın Silahlı Qüvvələri müasir silah növləri ilə təchiz edilir, eyni zamanda bir çox dünya ölkələri istehsal olunan məhsullara maraq göstərir.
Daylinews-az-ın verdiyi xəbərə görə, bu fikirlər Azərbaycan Prezidenti İlham Əliyevin “ADEX-2024” 5-ci Yubiley Azərbaycan Beynəlxalq Müdafiə Sərgisi və “Securex Caspian” 14-cü Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisinin iştirakçılarına göndərdiyi məktubunda əksini tapıb.
Prezident İlham Əliyev, bir çox dost və müttəfiq dövlətlərlə müdafiə sənayesi sahəsində yeni əməkdaşlıqların qurulduğunu, mövcud əlaqələrin uğurla davam etdirildiyini vurğulayaraq, Azərbaycanın müdafiə sənayesində dinamik inkişaf etdiyini və hərbi-texniki imkanlarını genişləndirdiyini qeyd edib.
Dövlət başçısı bildirib ki, Azərbaycan hərbi sənaye kompleksinin istehsal etdiyi müasir silahlar, ölkəmizin ərazilərinin işğaldan azad edilməsində mühüm rol oynayıb və bu silahlar “ADEX” sərgisi çərçivəsində də nümayiş olunur. Həmçinin 44 günlük Vətən müharibəsi və sonrakı lokal antiterror əməliyyatları zamanı əldə edilən döyüş təcrübəsi bir çox inkişaf etmiş ölkələrin hərbi mərkəzləri tərəfindən diqqətlə öyrənilir.
Prezident əlavə edib ki, “ADEX” sərgisi ilə yanaşı, hüquq mühafizə, sərhəd, yanğınsöndürmə və xilasetmə xidmətləri üçün nəzərdə tutulmuş avadanlıqların nümayiş etdirildiyi “Securex Caspian” sərgisi də keçirilir və bu sərgidə təqdim olunan məhsullar iştirakçılar tərəfindən böyük maraqla qarşılanır.
