Prezident İlham Əliyev Naxçıvan Muxtar Respublikasında yeni istilik elektrik stansiyasının tikintisi ilə bağlı tədbirlər haqqında sərəncam imzalayıb.
Daylinews-az.com xəbər verir ki, sərəncama əsasən, Dövlət Neft Şirkəti (SOCAR) beynəlxalq təcrübəni nəzərə alaraq stansiyanın tikintisi üçün tərəfdaş investorlarla danışıqlar aparmalı və texniki sənədlərin hazırlanmasını təmin etməlidir.
Sərəncamın əsas məqamları:
- SOCAR-ın vəzifələri:
- Potensial tərəfdaş investorlarla danışıqlar aparılması,
- Məsləhətçi şirkətlərin cəlb edilməsi,
- Texniki İqtisadi Əsaslandırma və digər layihə sənədlərinin hazırlanması,
- Layihənin yekun təkliflərinin beş ay müddətində Nazirlər Kabinetinə təqdim edilməsi.
- Nazirlər Kabineti:
- İqtisadiyyat Nazirliyi və digər aidiyyəti qurumlarla birgə istilik elektrik stansiyasının ötürücü şəbəkəyə qoşulması və zəruri infrastrukturun təkmilləşdirilməsi üçün maliyyə planının hazırlanması,
- Layihənin dövlət büdcəsinin investisiya xərclərində nəzərə alınmasını təmin etməli.
- Naxçıvanın Nazirlər Kabineti:
- Prezidentin Muxtar Respublikada səlahiyyətli nümayəndəliyi ilə razılaşdıraraq, stansiya üçün uyğun torpaq sahəsinin müəyyənləşdirilməsi və təkliflərin SOCAR-a təqdim olunması,
- Bir ay ərzində torpaq sahəsi ilə bağlı məsələlərin həlli.
- “Azərenerji” və “Azərişıq” ASC:
- Stansiyanın Naxçıvanın enerji sisteminə qoşulması üçün lazımi infrastrukturun təmin edilməsi,
- Muxtar Respublikanın enerji tələbatının ödənilməsi ilə bağlı təkliflərin hazırlanması.
Əsas məqsəd
Yeni istilik elektrik stansiyasının tikintisi Naxçıvanın enerji təminatını yaxşılaşdırmaq, enerji sistemini dayanıqlı etmək və regionun daxili tələbatını ödəmək üçün mühüm əhəmiyyət kəsb edir.
