Bakıda SABAH qruplarının tələbələrinin yaradıcılıq potensialını nümayiş etdirmək məqsədilə təşkil olunan SABAH İncəsənət Festivalının açılış mərasimi Müasir İncəsənət Muzeyində keçirilib. Festivalın əsas məqsədi gənclər arasında incəsənət və yaradıcılığa marağı artırmaq, ali təhsil müəssisələrində həyata keçirilən sənət layihələrini ictimaiyyətə təqdim etmək və tələbələrin əldə etdikləri nailiyyətləri nümayiş etdirməkdir. Tədbir çərçivəsində müxtəlif ali təhsil ocaqlarının istedadlı tələbələrinin əsərləri ziyarətçilərə təqdim olunur.
Açılış mərasimində dövlət qurumlarının nümayəndələri, ali məktəblərin rəhbərləri və müəllimləri, mədəniyyət və incəsənət xadimləri, rəssamlar, tələbələr və digər qonaqlar iştirak ediblər. Festivalın ilk günündə Azərbaycan Rəssamlıq Akademiyasının SABAH qruplarında təhsil alan tələbələrin hazırladıqları dekorativ-tətbiqi sənət və dizayn nümunələrindən ibarət sərgi ziyarətçilərin ixtiyarına verilib.
Tələbələrin yaradıcılığı geniş auditoriyaya təqdim olunur
Müasir İncəsənət Muzeyində təşkil olunan ekspozisiyada bədii xalçalar, keramika və şüşə sənəti nümunələri, metal üzərində işlənmiş əsərlər, dekorativ rəngkarlıq, toxuculuq və müxtəlif dizayn layihələri nümayiş etdirilir. Sərgidə yer alan bütün işlər tələbələrin fərdi yaradıcılıq yanaşmasını və peşəkar hazırlığını əks etdirir.
Festivalın açılış proqramı çərçivəsində Azərbaycan Dövlət Mədəniyyət və İncəsənət Universitetinin SABAH qruplarının tələbələri tərəfindən “Rəssam, gəl sevgilimin şəklini çək” adlı bədii kompozisiya da təqdim olunub. Səhnə işi tamaşaçılar tərəfindən maraqla qarşılanıb və proqramın diqqətçəkən hissələrindən biri olub.
Qeyd edək ki, Azərbaycan Rəssamlıq Akademiyasının SABAH tələbələrinin əl işlərindən ibarət sərgi iyulun 2 və 3-də də Müasir İncəsənət Muzeyində davam edəcək və bütün sənətsevərlər üçün açıq olacaq.
