Türkiyə kino və televiziya sənəti ağır itki ilə üzləşib. “Çukur”, “Diriliş Ertuğrul” və bir sıra məşhur seriallardakı rolları ilə tanınan aktyor Mustafa Başalan 52 yaşında dünyasını dəyişib. İlkin məlumata görə, aktyor qəfil baş verən ürək tutması nəticəsində vəfat edib. Bu xəbər həm sənət cameəsində, həm də onun pərəstişkarları arasında böyük kədər doğurub.
Aktyorlar Həmkarlar İttifaqı başsağlığı verib
Mustafa Başalanın vəfatı ilə bağlı ilk rəsmi açıqlamalardan biri Türkiyə Aktyorlar Həmkarlar İttifaqı tərəfindən sosial şəbəkə hesabında paylaşılıb. Bəyanatda mərhum sənətkarın ailəsinə və yaxınlarına dərin hüznlə başsağlığı verilib, onun sənətə verdiyi töhfələrin daim xatırlanacağı vurğulanıb.
Başalan uzun illər televiziya və kino sahəsində fəaliyyət göstərərək müxtəlif obrazları canlandırıb. Tamaşaçılar onu xüsusilə “Çukur” və “Diriliş Ertuğrul” seriallarındakı rolları ilə tanıyırdı. Bundan başqa, aktyor “Siyah Kalp”, “Sahipsizler”, “Kulis”, “Bir Gece Masalı”, “Deha”, “Kızılcık Şerbeti”, “Teşkilat”, “Gönül Dağı”, “Yasak Elma” və “Börü” kimi ekran işlərində də rol alıb.
Türkiyə mediasının yaydığı məlumata görə, Mustafa Başalanın qəfil vəfatı sənət ictimaiyyətində böyük təəssüf hissi yaradıb. Sosial şəbəkələrdə aktyorun həmkarları və pərəstişkarları onun xatirəsini ehtiramla anaraq ailəsinə səbir diləyiblər. O, televiziya ekranlarında yaratdığı fərqli obrazlarla izləyicilərin yaddaşında qalacaq.
