2026-cı il Həcc mövsümü ilə bağlı Azərbaycandan müqəddəs ziyarətə yola düşəcək zəvvarların uçuş cədvəli müəyyənləşib. Bu il ümumilikdə 7 təyyarə ilə zəvvarların Səudiyyə Ərəbistanına səfəri təşkil olunacaq.
Məlumata görə, hər bir təyyarədə 4 zəvvar qrupu yerləşdiriləcək. Proses Qafqaz Müsəlmanları İdarəsi tərəfindən koordinasiya olunur.
Qurumun Xarici Əlaqələr şöbəsinin müdiri və Həcc elektron sisteminin rəhbəri Vüsal Cahangiri bildirib ki, zəvvarların səfəri bir neçə gün ərzində mərhələli şəkildə həyata keçiriləcək.
Uçuşlar mərhələli şəkildə təşkil ediləcək
Rəsmi açıqlamaya əsasən, zəvvarları daşıyacaq təyyarələrin hərəkət qrafiki belə planlaşdırılıb:
- birinci və ikinci təyyarələr – mayın 17-də
- üçüncü və dördüncü təyyarələr – mayın 18-də
- beşinci və altıncı təyyarələr – mayın 19-da
- yeddinci təyyarə – mayın 21-də
Qeyd olunub ki, əsasən gündə iki reys həyata keçiriləcək – səhər və axşam saatlarında. Yalnız sonuncu gün – mayın 21-də bir təyyarə yola düşəcək.
Zəvvarlar əvvəlcə Ciddə şəhərinə enəcək, daha sonra avtobuslarla Cöhfə miqatı istiqamətində hərəkət edəcəklər. Orada ehram bağlayan zəvvarlar gecə saatlarında Məkkəyə çatacaqlar.
Qeyd edək ki, bu il Həcc ziyarəti üçün müəyyən olunmuş paket qiyməti bir nəfər üçün 6100 ABŞ dollarıdır. Bu məbləğə uçuş, yerləşmə və ziyarət müddətində göstərilən əsas xidmətlər daxildir. Hər il olduğu kimi, zəvvarların təhlükəsizliyi və rahatlığı üçün xüsusi təşkilati tədbirlər görülür.
