Birgə səyahət bəzən dostluğu daha da möhkəmləndirir, bəzən isə tam əksinə, münasibətləri korlayır. Son araşdırmalara görə, bir çox turist artıq tək səyahət etməyə üstünlük verir, çünki qrup çatlarında bitməyən razılaşmalar, fərqli istəklər və büdcə mübahisələri tətil həyəcanını əvvəlcədən yorucu prosesə çevirir.
Təcrübəli səyyah Mark Volters hesab edir ki, uğurlu tətil təkcə seçilən ölkə, otel və hava şəraitindən asılı deyil. Əsas məsələ kiminlə yola çıxmağınızdır. Onun sözlərinə görə, bəzi insanlarla uzun səfərə getmək həm istirahəti, həm də münasibətləri riskə ata bilər.
Ən çox problem yaradan 5 tip insan:
- Dram sevənlər və hər şeyi böyüdənlər
- Münaqişə axtaranlar
- Pul məsələsində uyğun olmayanlar
- Münasibəti sabit olmayan cütlüklər
- Fərqli səyahət tərzinə malik insanlar
Dram sevənlər və sakitliyi pozanlar
Volters ilk olaraq hər vəziyyəti emosional böhrana çevirən insanlardan danışır. Belə adamlarla bir-iki günlük qısa səfər mümkün olsa da, bir həftəlik və ya daha uzun tətil ciddi yorğunluq yarada bilər. Onlar hotellə, yeməklə, hava ilə, planla və hətta xırda gecikmələrlə bağlı narazılıq yarada bilirlər.
İkinci riskli qrup münaqişə axtaran insanlardır. Onlar restoranda, hava limanında, küçədə və ya oteldə asanlıqla dava sala bilirlər. Xarici ölkədə belə davranış təkcə əhvalı pozmur, həm də ciddi hüquqi problemə səbəb ola bilər. Volters xəbərdarlıq edir ki, bu cür insanların yaratdığı problemə siz də istəmədən qarışa bilərsiniz.
Pul məsələsində uyğun olmayan dostlar
Səyahətdə ən həssas mövzulardan biri büdcədir. Əgər siz muzeyə, ekskursiyaya və yerli mətbəxi dadmağa pul xərcləmək istəyirsinizsə, yanınızdakı insan hər dəfə “gəlin marketdən nəsə alaq” deyirsə, tətil tezliklə narazılığa çevriləcək.
Əks vəziyyət də eyni dərəcədə çətindir. Dostlarınız bahalı restoranlar, lüks otellər və əlavə turlar istəyirsə, sizin büdcəniz buna imkan verməyə bilər. Bu halda insan ya özünü borclu hiss edir, ya da səfər boyu gərginlik yaşayır.
Voltersin fikrincə, yola çıxmazdan əvvəl pul mövzusu açıq danışılmalıdır. Kim nə qədər xərcləməyə hazırdır, hesab necə bölünəcək, hansı fəaliyyətlər mütləqdir – bunları əvvəlcədən razılaşdırmaq tətili xilas edə bilər.
Münasibəti möhkəm olmayan cütlüklər
Təcrübəli turistin fikrincə, münasibətlərdə problem varsa, uzun səyahət bunu gizlətmir, əksinə, daha da böyüdür. Tətil zamanı insanlar günün böyük hissəsini birlikdə keçirir, qərarları birgə verir və yorğunluq fonunda xırda narazılıqlar belə böyüyə bilir.
Əgər cütlük bir-birini yaxşı tanımırsa və ya münasibətdə artıq gərginlik varsa, ilk ciddi səyahət gözlənilən romantik təcrübəyə deyil, sınağa çevrilə bilər. Ona görə belə hallarda qısa səfərlə başlamaq daha təhlükəsizdir.
Səyahət tərzi uyğun gəlməyən insanlar
Bəziləri səhər tezdən oyanıb şəhəri gəzməyi sevir, bəziləri isə gecə əyləncələrindən sonra günortaya qədər yatmaq istəyir. Kimsə muzey və tarixi yerləri seçir, digəri alış-veriş və çimərlik arzulayır. Bu fərqlər əvvəlcədən danışılmasa, səfərin ortasında ciddi narazılıq yarada bilər.
Volters bildirir ki, fərqli maraqlar problem deyil, əsas məsələ hamının eyni plana məcbur edilməməsidir. Bir gün ayrı-ayrı proqram seçmək, sonra axşam yenidən görüşmək daha sağlam variant ola bilər.
Səyahət planlaşdırarkən əsas qayda sadədir: yola çıxmazdan əvvəl gözləntiləri, büdcəni və gündəlik ritmi danışmaq lazımdır. Əks halda ən gözəl istiqamət belə yorucu təcrübəyə çevrilə bilər.
Səyahət yoldaşı seçimi qədər çamadanın düzgün hazırlanması da vacibdir. Çünki səfər zamanı baqajın gecikməsi və ya itməsi bütün planları poza bilər. Belə vəziyyətə əvvəlcədən hazır olmaq üçün valiz itkisi məsləhətləri yazısına da baxa bilərsiniz.
