Oktyabrın 8-də Gəncə şəhər stadionunda III MDB Oyunlarının bağlanış mərasimi böyük zəfər ab-havasında keçirildi. Tədbirdə rəsmi qonaqlar, beynəlxalq idman təşkilatlarının nümayəndələri, iştirakçı ölkələrin idmançıları və minlərlə tamaşaçı bir araya gəldi. Mərasim yarışın ən yaddaqalan anlarını əks etdirən videoçarxın nümayişi ilə başladı və Azərbaycanın Dövlət himni səsləndirildi.
Təşkilat Komitəsinin sədri Samir Şərifov çıxışında Azərbaycanı idman paytaxtına çevirən III MDB Oyunlarının yüksək səviyyədə və ən yeni standartlarla təşkil olunduğunu vurğuladı. O, “Gəncə, Şəki, Qəbələ, Yevlax, Mingəçevir, Göygöl və Xankəndi on bir gün ərzində böyük idman bayramına çevrildi” sözlərini səsləndirdi və qənaətbəxş təşkilatçılığı Prezident İlham Əliyevin idmana göstərdiyi diqqətlə əlaqələndirdi.
Mərasimdə MDB bayrağı yarışın qalibləri tərəfindən endirildi və növbəti ev sahibi ölkəyə təqdim olunmaq üçün MDB İcraiyyə Komitəsinə verildi. Rəsmi hissədən sonra tədbir bədii proqramla davam etdi.
Bu ilki III MDB Oyunlarına 13 ölkədən 1 624 idmançı və 2 337 nümayəndə qatılıb. Azərbaycan 340 idmançı ilə, Rusiya 262, Özbəkistan 254, Belarus 240, Qazaxıstan 147, Tacikistan 144, Qırğızıstan 126, Türkmənistan 48, Türkiyə 38, Kuba 11, Küveyt 6, Oman və Pakistan isə 4 idmançı ilə təmsil olunub. Azərbaycan idmançıları turniri 184 medalla tamamlayaraq (33 qızıl, 56 gümüş, 95 bürünc) medal sıralamasında ikinci yerdə qərarlaşıb və MDB Oyunları tarixində ən yüksək nəticəsinə nail olub.
