Maykl Mannın çəkəcəyi məşhur kriminal triller “Heat 2” filmi ilə bağlı yeni detallar məlum olub. Məlumata görə, uzun sürən danışıqlardan sonra Oskar mükafatlı aktyor Leonardo DiKaprio layihədə çəkilməyə razılıq verib. O, 1995-ci ildə Val Kilmerin canlandırdığı Kris Şiherlis obrazını ifa edəcək.
Mənbələrin məlumatına əsasən, DiKaprio əvvəlcə Kris Şiherlis və Nil Makkoli rolları arasında seçim edirdi. Sonda aktyor Kris Şiherlis obrazına üstünlük verib.
Filmdə daha hansı məşhur aktyorlar rol alacaq?
Yeni ekran əsərinin aktyor heyətində daha bir neçə tanınmış sima yer alacaq.
Kristian Beyl ilk filmdə Al Paçinonun canlandırdığı detektiv Vinsent Hanna obrazını ifa edəcək. Adam Drayver isə filmin əsas mənfi qəhrəmanı Otis Uordell roluna dəvət olunub və tərəflər arasında danışıqlar yekun mərhələyə çatıb. Bundan başqa, Stiven Qrem Robert De Nironun canlandırdığı Nil Makkoli obrazını oynamaq üçün danışıqlar aparır.
“Heat 2” Maykl Mann və Meq Qardinerin 2022-ci ildə nəşr olunan eyniadlı romanı əsasında çəkilir. Film həm orijinal ekran əsərinin prekveli, həm də davamı olacaq və hadisələr həm 1995-ci il filmindən əvvəlki, həm də sonrakı dövrü əhatə edəcək.
Çəkilişlər noyabrda başlayacaq
Layihənin ilkin büdcəsi təxminən 200 milyon dollar qiymətləndirilsə də, bu səbəbdən Warner Bros. istehsaldan imtina edib. Daha sonra layihəni Amazon MGM Studios öz üzərinə götürüb və büdcə təxminən 170 milyon dollara endirilib. Çəkilişlərin noyabr ayında başlaması planlaşdırılır. Filmin Los-Anceles, Çikaqo, Paraqvay və Sinqapurda lentə alınacağı bildirilir.
1995-ci ildə nümayiş olunan ilk “Heat” kriminal kino tarixinin ən uğurlu filmlərindən biri hesab olunur. Film xüsusilə Al Paçino ilə Robert De Nironun ilk dəfə eyni kadra çıxması və əfsanəvi atışma səhnəsi ilə yadda qalıb. Bu ekran əsəri sonrakı illərdə bir çox rejissor üçün ilham mənbəyinə çevrilib.
