Azərbaycan Prezidenti İlham Əliyev və Almaniyanın Federal Kansleri Fridrix Merts Bakıda keçirilən geniştərkibli görüşdən sonra mətbuata birgə bəyanatlarla çıxış edərək iki ölkə arasında siyasi, iqtisadi və enerji əməkdaşlığının yeni mərhələyə qədəm qoyduğunu bildiriblər. Tərəflər münasibətlərin genişləndirilməsi, Cənubi Qafqazda sülh prosesinin dəstəklənməsi, enerji təhlükəsizliyi, nəqliyyat-tranzit marşrutları və yaşıl enerji sahəsində əməkdaşlığın dərinləşdirilməsi ilə bağlı mühüm mesajlar veriblər.
Prezident İlham Əliyev vurğulayıb ki, Azərbaycan və Almaniya arasında münasibətlər yalnız ikitərəfli əməkdaşlıqla məhdudlaşmır və bütövlükdə regionda sabitliyə xidmət edir.
“Azərbaycan-Almaniya əlaqələri təkcə ikitərəfli münasibətlərə yox, bütövlükdə bölgəmizdə əməkdaşlığa, sülhə, əmin-amanlığa öz töhfəsini verəcək”, – deyə dövlət başçısı bildirib.
Enerji və tranzit sahəsində əməkdaşlıq prioritet olacaq
Prezident İlham Əliyev çıxışında enerji təhlükəsizliyinin Azərbaycan-Almaniya əməkdaşlığının əsas istiqamətlərindən biri olaraq qalacağını qeyd edib. Onun sözlərinə görə, hazırda Azərbaycanın təbii qazı Avropa İttifaqına üzv olan 10 ölkəyə ixrac edilir və bu, Avropanın enerji təhlükəsizliyinə mühüm töhfə verir.
“Bu gün bizim qazımız Avropa İttifaqına üzv 10 ölkəyə çatdırılır və şübhəsiz bu, enerji təhlükəsizliyi üçün çox böyük töhfədir. Nəzərə alsaq ki, Azərbaycan öz neftini də Almaniyaya ixrac edir və gələcəkdə yaşıl enerjisini də Avropa məkanına çatdırmaq əzmindədir, enerji sahəsində əməkdaşlıq çox geniş miqyaslı olacaqdır”, – deyə Prezident vurğulayıb.
Dövlət başçısı nəqliyyat və logistika sahəsində də böyük potensialın mövcud olduğunu diqqətə çatdırıb.
“Bağlantılarla və tranzit imkanları ilə bağlı da Almaniya-Azərbaycan əməkdaşlığının çox böyük əhəmiyyəti var, çünki Almaniyanın şirkətləri bu istiqamətdə çox böyük uğurlar əldə ediblər”, – deyən Prezident bildirib ki, Azərbaycan son illərdə nəqliyyat infrastrukturunu sürətlə modernləşdirib və Orta Dəhlizin inkişafında mühüm rol oynayır.
Onun sözlərinə görə, Azərbaycanın Mərkəzi Asiya ilə əməkdaşlığının genişlənməsi ölkəni Avropa ilə Mərkəzi Asiya arasında strateji körpüyə çevirir və bu əhəmiyyət gələcək illərdə daha da artacaq.
Fridrix Merts: Almaniya əməkdaşlığın genişlənməsində maraqlıdır
Almaniyanın Federal Kansleri Fridrix Merts isə çıxışında iki ölkə arasında münasibətlərin son illərdə dinamik inkişaf etdiyini bildirib.
“Mən şadam ki, Almaniya ilə Azərbaycan arasındakı münasibətlər çox dinamik şəkildə inkişaf edir”, – deyən kansler əlavə edib ki, regionda daha böyük sabitliyin təmin olunması iqtisadi əlaqələrin genişlənməsi üçün yeni imkanlar yaradır.
Merts bildirib ki, tərəflər səfər çərçivəsində Birgə Bəyannamə imzalayıblar və Azərbaycan-Almaniya Biznes Şurasının yaradılması barədə razılıq əldə ediblər.
“Bu gün Birgə Bəyannaməni imzalamaqla münasibətlərimizin daha da inkişaf etdirilməsi üçün mühüm təməl qoyuruq. Eyni zamanda, Azərbaycan-Almaniya Biznes Şurasının təsis edilməsi barədə razılığa gəldik”, – deyə Almaniya kansleri bildirib.
Onun sözlərinə görə, Almaniya Bakı ilə iqtisadi tərəfdaşlığın genişləndirilməsinə strateji yanaşır.
“Bu, hər iki ölkə üçün mühüm siqnaldır və Almaniya Azərbaycanla münasibətlərin genişləndirilməsinə ciddi yanaşır. Orta Şərqdə davam edən böhran fonunda neft, eləcə də Cənub Qaz Dəhlizi vasitəsilə qaz təchizatı sahəsində əməkdaşlığımız xüsusi əhəmiyyət kəsb edir”, – deyə Merts vurğulayıb.
Sülh prosesi və Cənubi Qafqazın gələcəyi diqqət mərkəzində olub
Mətbuat konfransında regional təhlükəsizlik məsələləri də geniş müzakirə olunub. Fridrix Merts bildirib ki, həm Almaniyanın, həm də Azərbaycanın siyasi və iqtisadi maraqları son illərdə baş verən böyük müharibələrdən mənfi təsirlənib.
“Siyasi təhlükəsizlik və Almaniya ilə Azərbaycanın iqtisadi maraqları böyük müharibələrdən ciddi şəkildə zərər görüb. Bu münaqişələr fərqli olsa da, onların həlli yalnız danışıqlar yolu ilə mümkündür. Məhz bu halda davamlı sülhə, təhlükəsizliyə və sabitliyə nail olmaq olar”, – deyə kansler qeyd edib.
O, həmçinin Cənubi Qafqazda sülhün Avropa üçün də strateji əhəmiyyət daşıdığını vurğulayıb.
“Bizə Cənubi Qafqazda da sülh, təhlükəsizlik və sabitlik lazımdır. Almaniya və Avropa İttifaqı geosiyasi baxımdan mühüm əhəmiyyət daşıyan bu regionda uzunmüddətli sabitliyin bərqərar olmasında tam maraqlıdır”, – deyə Fridrix Merts bildirib.
Kansler Azərbaycan və Ermənistan arasında paraflanmış sülh sazişini də alqışlayaraq bunu uzun illər davam edən münaqişənin aradan qaldırılması üçün tarixi imkan kimi qiymətləndirib.
Hər iki liderin bəyanatları göstərir ki, Bakı və Berlin münasibətləri enerji, nəqliyyat, ticarət, investisiya və regional təhlükəsizlik kimi sahələrdə yeni mərhələyə qədəm qoyur. Tərəflər əməkdaşlığın daha da genişləndirilməsi üçün siyasi iradənin mövcud olduğunu bir daha təsdiqləyiblər.
