Didye Deşamın rəhbərlik etdiyi Fransa millisi İsveçə qarşı oyunda favorit statusunu doğruldub. Fransızlar ilk dəqiqələrdən topa nəzarəti ələ keçirərək rəqib qapısı önündə ardıcıl təhlükəli epizodlar yaradıblar.
Mbappe əvvəlcə ofsayda düşdüyü üçün qol sevincini yaşaya bilmədi, daha sonra isə zərbəsi dirəyə tuş gəldi. Buna baxmayaraq, ilk hissənin sonlarında hesabı açan hücumçu dünya çempionatındakı beşinci qolunu vurdu və mundiallardakı ümumi qol sayını 17-yə çatdırdı.
İkinci hissədə Bredli Barkola fərqi artırdı. Matç boyu iki məhsuldar ötürmə ilə seçilən Maykl Olise yenidən Mbappeni dəqiq ötürmə ilə tapdı və fransız ulduz dubla imza atdı. Nəticədə Fransa 3:0 hesablı qələbə qazanaraq 1/8 finalda Paraqvayın rəqibi oldu.
Meksika doğma azarkeşləri önündə inamlı çıxış etdi
İyulun 1-də Mexikodakı məşhur Estadio Banorte (Azteka) stadionunda keçirilən Meksika – Ekvador görüşü güclü yağış səbəbindən bir saat gec başladı. Buna baxmayaraq, meydan sahibləri ilk hissədə oyunun taleyini həll etməyi bacardılar.
Julian Kinyones və Raul Ximenesin qolları Meksikaya rahat üstünlük qazandırdı. Ekvador fasilədən sonra fərqi azaltmağa çalışsa da, ciddi təhlükə yarada bilmədi. Qarşılaşmanın əlavə vaxtında Piero İnkapiye qırmızı vərəqə alaraq komandasını azlıqda qoydu.
Beləliklə, Meksika 2:0 hesabı ilə qalib gələrək növbəti mərhələdə İngiltərə – DR Konqo cütünün qalibi ilə qarşılaşacaq.
Holand Norveçi növbəti mərhələyə daşıdı
ABŞ-ın Arlinqton şəhərində yerləşən AT&T Stadium arenasında keçirilən Kot-d’İvuar – Norveç qarşılaşması dramatik sonluqla yadda qalıb.
Antonio Nusa ilk hissədə Norveçi hesabda önə çıxarsa da, Kot-d’İvuar Diallonun 74-cü dəqiqədə vurduğu qolla tarazlığı bərpa edib. Lakin son sözü yenə Erlinq Holand deyib. Ulduz hücumçu 86-cı dəqiqədə fərqlənərək komandasına 2:1 hesablı qələbə qazandırıb. Norveç 1/8 finalda Braziliya millisi ilə üz-üzə gələcək.
