Müasir incəsənətin ən tanınmış simalarından biri hesab olunan britaniyalı rəssam Devid Hokni 88 yaşında dünyasını dəyişib. Onun ölüm xəbəri agentinin açıqlamasına istinadən yayılıb.
Devid Hokni XX əsrin ikinci yarısı və XXI əsrin əvvəllərində dünya təsviri sənətinə mühüm təsir göstərmiş rəssamlardan biri kimi tanınırdı. O, rəngkarlıq, qrafika, fotoqrafiya və rəqəmsal incəsənət sahələrində yaratdığı əsərlərlə beynəlxalq şöhrət qazanmışdı.
Rekord qıran əsərlərin müəllifi
Hokninin yaradıcılığı təkcə sənət aləmində deyil, hərrac bazarında da böyük maraq doğururdu. Onun əsərləri dəfələrlə yaşayan rəssamların ən bahalı işləri sırasında yer alıb.
2018-ci ildə rəssamın 1972-ci ildə yaratdığı “Portrait of an Artist (Pool with Two Figures)” əsəri Nyu-Yorkda keçirilən hərracda 90,3 milyon dollara satılaraq dünya ictimaiyyətinin diqqətini çəkmişdi. Bu nəticə həmin dövrdə yaşayan rəssamın əsəri üçün ödənilən ən yüksək məbləğlərdən biri hesab olunurdu.
Devid Hokninin ən məşhur işləri arasında “Splash” (“Sıçrayış”) seriyası xüsusi yer tutur. Bu tablolar hovuzda suyun sıçrama anını əks etdirir. Maraqlıdır ki, rəsmlərdə suya tullanan insan görünmür, yalnız onun yaratdığı hərəkətin izi təsvir edilir. Məhz bu yanaşma Hokninin üslubunun əsas xüsusiyyətlərindən biri sayılırdı.
Rəssam uzun karyerası ərzində müasir incəsənətin inkişafına böyük töhfə verib və bir neçə nəsil yaradıcı insan üçün ilham mənbəyinə çevrilib. Onun irsi dünya muzeylərində və şəxsi kolleksiyalarda yaşamaqda davam edəcək.
