Amerikalı məşhur pop ulduzu Cennifer Lopez bu ilin yayında Astanada səhnəyə çıxacaq. Daylinews-az xəbər verir ki, sənətçinin rəsmi ofisi onun dünya turnesinin yay təqvimini açıqlayıb.
Cennifer Lopezin Astanadakı konserti 1 avqust tarixində baş tutacaq. “Astana Arena” stadionunda keçiriləcək bu tədbir müğənninin “Up All Night” adlı dünya turu çərçivəsində olacaq. JLo Qazaxıstana Birləşmiş Ərəb Əmirliklərinin paytaxtı Əbu-Dabidən gələcək.
“Bu yay bir neçə xüsusi konsertim olacaq. Sizinlə görüşməyi səbirsizliklə gözləyirəm. Çoxdan görüşməmişik. Bu yay möhtəşəm keçəcək“, – deyə sənətçi öz Instagram səhifəsində yazıb.
Turne çərçivəsində Cennifer Lopez 17 şəhərdə çıxış edəcək. Konsertlər bir-birini izləyən günlərdə təşkil olunacaq. İlk tədbirlər kurort şəhərlərdə — İstanbul, Antaliya və Şarm-əl-Şeyxdə keçiriləcək. Daha sonra müğənni Kadis, Malaga, Madrid, Barselona, Varşava, Budapeşt və Buxarest kimi Avropa şəhərlərində səhnəyə çıxacaq.
Mərkəzi Asiyada Lopez yalnız Qazaxıstanın paytaxtı Astanada çıxış edəcək. Buradan o, dünya turunun son dayanacağı olan İrəvana yollanacaq.
