HBO-nun məşhur “Euphoria” serialının üçüncü mövsümündə yayımlanan son bölümlərdən biri sosial şəbəkələrdə geniş rezonans doğurub. Müzakirələrin əsas səbəbi isə serialın ulduzlarından biri olan Sidni Svininin canlandırdığı Kessi Hovard obrazının səsləndirdiyi fikirlər olub. Bölümdə yer alan bir dialoq qısa müddətdə siyasi və ictimai debatlara çevrilib.
“This Little Piggy” adlı beşinci epizodda Kessi Hovardın OnlyFans platformasında sürətlə populyarlaşdığı göstərilir. Personaj müxtəlif podkastlara qatılır və burada kişilərin cəmiyyətdəki vəziyyəti barədə danışır. Məhz həmin səhnələrdən birində aparıcının “Sən demokrat kimi danışırsan” sözlərinə Kessinin verdiyi sərt cavab sosial mediada böyük reaksiyaya səbəb olub.
Sosial şəbəkələrdə mübahisə böyüyür
Epizod yayımlandıqdan sonra X və digər platformalarda istifadəçilər arasında geniş müzakirələr başlayıb. Bəzi izləyicilər bunun sadəcə ssenari olduğunu desələr də, digərləri Sidni Svininin şəxsi baxışlarının obraz vasitəsilə ekrana daşındığını iddia ediblər.
Aktrisanın adı son illərdə ABŞ-də siyasi mübahisələrdə bir neçə dəfə hallanıb. Xüsusilə “Sydney Sweeney Has Great Genes” sloqanı ilə yayımlanan reklam kampaniyasından sonra o, sosial şəbəkələrdə geniş müzakirə olunmuşdu. Daha sonra Svininin Respublikaçılar Partiyasına yaxın mövqedə olduğu barədə xəbərlər də diqqət çəkmişdi.
Bəzi izləyicilər serialdakı son səhnənin təsadüfi olmadığını düşünür. Sosial mediada yayılan şərhlərdə “Sidni burada rol oynamırdı”, “Bu səhnə xüsusi olaraq onun imicinə uyğun yazılıb” kimi fikirlər üstünlük təşkil edib.
Aktrisa siyasətdən uzaq qalmağa çalışır
Sidni Svini isə əvvəlki müsahibələrində dəfələrlə siyasət haqqında danışmaq istəmədiyini bildirib. Aktrisa qeyd edib ki, onun əsas məqsədi sənətlə məşğul olmaqdır və insanlar tərəfindən ona müxtəlif etiketlərin yapışdırılması şəxsi nəzarətindən kənardır.
Bu arada “Euphoria” serialının üçüncü mövsümü ümumilikdə də tənqid olunur. Bir çox tamaşaçı və məzmun istehsalçıları hesab edir ki, serialda seks sənayesinin təqdimatı həddindən artıq dramatik və stereotip şəkildə göstərilib. Xüsusilə OnlyFans platformasında çalışan bəzi yaradıcılar ekran işindəki təsvirləri “reallıqdan uzaq və zərərli” adlandırıblar.
Bununla belə, serial yenə də gündəmdən düşmür. Yeni mövsüm hər bölümündə həm sosial, həm də siyasi müzakirələr yaradaraq televiziya dünyasında ən çox danışılan layihələrdən biri olaraq qalır.
