Hollivudun ən məşhur simalarından biri olan Marilyn Monroe vəfat etdikdən 64 il sonra onun ölümü ilə bağlı mübahisələr yenidən gündəmə gəlib. Yeni sənədli film layihəsi aktrisanın ölüm səbəbi barədə uzun illərdir davam edən sualları bir daha aktuallaşdırıb.
“Celebrity Crime Scene: Marilyn Monroe” adlı ekran işinin müəllifləri rəsmi versiyada bəzi ziddiyyətli məqamların olduğunu iddia edirlər. Filmdə diqqət çəkilən məqamlardan biri Monronun tapıldığı otağın həddindən artıq səliqəli vəziyyətdə olmasıdır. Həmçinin dərmanların nizamlı şəkildə yerləşdirildiyi, yatağın yanında isə su stəkanının olmaması kimi detallar xüsusi vurğulanır.
Köhnə şayiələr yenidən gündəmdə
Sənədli filmdə aktrisanın John F. Kennedy və qardaşı Robert F. Kennedy ilə əlaqələri barədə illərdir müzakirə olunan iddialara da yer verilib. Müəlliflər hesab edirlər ki, bu münasibətlər Monronun həyatının son dövründə baş verən hadisələrin anlaşılması baxımından əhəmiyyət kəsb edə bilər.
Layihədə jurnalist Sid Skolskynin aktrisa ilə ölümündən qısa müddət əvvəl danışdığına dair iddialar da xatırladılır. Bununla belə, təqdim olunan məlumatların böyük hissəsi birbaşa sübutlara deyil, köhnə şahid ifadələrinə və uzun illərdir dolaşan fərziyyələrə əsaslanır.
Mütəxəssislər qeyd edirlər ki, indiyədək ortaya çıxan alternativ ssenarilərin heç biri hüquqi və ya elmi baxımdan təsdiqlənməyib. Buna görə də rəsmi istintaqın nəticələri qüvvədə qalır.
Xatırladaq ki, Merilin Monro 1962-ci il avqustun 5-də, 36 yaşında vəfat edib. Rəsmi sənədlərdə ölüm səbəbi yuxugətirici preparatların həddindən artıq qəbulu kimi göstərilib. Onilliklər ərzində aparılan araşdırmalara baxmayaraq, bu versiyanı təkzib edəcək qəti sübutlar ortaya çıxmayıb.
