2026–2030-cu illəri əhatə edən yeni Dövlət Proqramının icrası çərçivəsində kənd təsərrüfatı, balıqçılıq və akvakultura sahələrinin inkişafına dövlət büdcəsindən 2 milyard manata yaxın vəsaitin ayrılması nəzərdə tutulur.
Bu barədə maliyyə naziri Sahil Babayev Milli Məclisin plenar iclasında “2025-ci il dövlət büdcəsinin icrası haqqında” qanun layihəsinin müzakirəsi zamanı məlumat verib. Nazirin sözlərinə görə, aqrar sektor qeyri-neft iqtisadiyyatının əsas istiqamətlərindən biri olaraq qalır və dövlət tərəfindən hər il subsidiya, güzəştli maliyyələşmə və digər dəstək mexanizmləri vasitəsilə bu sahəyə ciddi dəstək göstərilir.
Dövlət Proqramı aqrar inkişafın yeni mərhələsini hədəfləyir
Sahil Babayev bildirib ki, Prezidentin 25 may 2026-cı il tarixli sərəncamı ilə təsdiqlənən “Kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı” ölkənin aqrar siyasətində yeni inkişaf mərhələsini müəyyənləşdirən əsas strateji sənədlərdən biridir. Nazir vurğulayıb ki, proqramın həyata keçirilməsi kənd təsərrüfatında istehsalın genişləndirilməsi, emal sənayesinin inkişafı, rəqabət qabiliyyətinin artırılması və regionlarda məşğulluğun gücləndirilməsi baxımından mühüm rol oynayacaq.
Hazırkı plana əsasən, proqramın maliyyələşdirilməsi üçün 2026–2030-cu illər ərzində dövlət büdcəsindən təxminən 2 milyard manat vəsait ayrılması nəzərdə tutulur. Ayrılacaq maliyyənin aqrar sahədə davamlı inkişafın təmin edilməsinə, fermerlərin dəstəklənməsinə və kənd təsərrüfatının müasir tələblərə uyğun inkişafına töhfə verəcəyi gözlənilir.
