İlin sonunadək dövlət tibb müəssisələrində uzun illərdir vətəndaşların narazılığına səbəb olan növbə probleminin böyük ölçüdə aradan qaldırılması planlaşdırılır. Bu barədə TƏBİB-in İcraçı direktorunun müavini Bahadur Rzayev media nümayəndələri ilə keçirilən görüşdə məlumat verib.
Onun sözlərinə görə, elektron növbə sistemi mərhələli şəkildə genişləndirilir və yaxın günlərdən etibarən daha 6 dövlət tibb müəssisəsində istifadəyə veriləcək. Məqsəd xəstələrin həkim qəbuluna çıxışını sürətləndirmək, eyni zamanda mövcud tibbi resurslardan daha səmərəli istifadəni təmin etməkdir. Rzayev bildirib ki, ilin sonuna qədər sistemin ölkə üzrə daha geniş tətbiqi nəzərdə tutulur.
Yeni onlayn sistem necə işləyəcək?
Bahadur Rzayev qeyd edib ki, vətəndaş seçdiyi xəstəxanada istədiyi həkim üçün boş vaxt tapa bilmədiyi halda, sistem avtomatik olaraq eyni ixtisas üzrə digər dövlət tibb müəssisələrində çalışan həkimlərin qəbul saatlarını da göstərəcək. Bu yanaşmanın uzun gözləmə müddətlərini azaltmağa və xidmətə çıxışı asanlaşdırmağa kömək edəcəyi gözlənilir.
İcraçı direktorun müavini vurğulayıb ki, hər bir həkimin gün ərzində qəbul edə biləcəyi pasiyent sayı məhduddur. Buna görə də vətəndaşların yalnız bir tibb müəssisəsində növbə olmadığı üçün narazılıq etməməsi, alternativ seçimlərdən istifadə etməsi tövsiyə olunur. Elektron növbə tətbiq edilən müəssisələrdə bu prosesdə vətəndaşlara dəstək göstərən əməkdaşlar da fəaliyyət göstərir.
İstifadə olunmayacaq növbələrin vaxtında ləğv edilməsinin vacibliyinə toxunan Bahadur Rzayev bildirib: “Statistikaya görə, bəzi tibb müəssisələrində onlayn növbə götürən vətəndaşların yalnız 58 faizi həkim qəbuluna gəlir. Təxminən 42 faiz isə növbəsindən istifadə etmir. Gəlməyəcəksinizsə, növbəni ləğv edin ki, həmin vaxtdan başqa vətəndaş yararlana bilsin”.
Onun sözlərinə görə, dövlət satınalma prosesi artıq elan edilib və layihənin genişləndirilməsi ilə pasiyentlər əvvəlcədən dəqiq qəbul saatı seçərək uzun növbələrdə gözləmədən tibbi xidmət ala biləcəklər. Rzayev hesab edir ki, sistemin uğurlu tətbiqi üçün ictimai maarifləndirmə və vətəndaşların elektron xidmətlərdən fəal istifadəsi də mühüm rol oynayacaq.
