Rusiya ordusu Ukraynanın cənub və şimal-şərq bölgələrinə növbəti genişmiqyaslı hava hücumları həyata keçirib. Gecə saatlarında Odessa raketlərlə, səhər tezdən isə Sumı idarəolunan aviasiya bombaları (KAB) ilə vurulub. Hücumlar nəticəsində hər iki şəhərdə mülki infrastruktur zədələnib, ölən və yaralananların olduğu bildirilir.
Odessada raket zərbəsi nəticəsində üçmərtəbəli yaşayış binası, avtomobillər, dini və məktəbəqədər təhsil müəssisələri, eləcə də digər mülki obyektlərə ziyan dəyib. Son məlumata görə, azı 2 nəfər həlak olub, 8 nəfər yaralanıb, xəsarət alanlar arasında uşaqlar da var. Faciə zamanı parkda olan bir qadın həyatını itirib, onun uşaqları isə sağ qalıb. Hadisə yerində xilasedicilər və psixoloqlar işləyib, şəhərdə operativ qərargah yaradılıb.
Sumıya beş KAB atılıb
Səhər saatlarında Rusiya qüvvələri Sumı şəhərinə beş idarəolunan aviasiya bombası atıb. Zərbələrin ikisi şəhərin mərkəzi hissəsinə düşüb. Hücum nəticəsində mülki infrastruktura, o cümlədən çoxmərtəbəli qeyri-yaşayış binasına ziyan dəyib, ətraf binalarda yüzlərlə pəncərə sınıb. Hadisə yerlərində xilasedicilər və digər aidiyyəti xidmətlər fəaliyyətini davam etdirir.
Sumı vilayətində son sutka ərzində baş verən müxtəlif hücumlar nəticəsində ümumilikdə 15 nəfər xəsarət alıb, onların arasında bir uşaq da var. Polis həmçinin Sumı–Bilani avtomobil yolunda pilotsuz uçuş aparatının zərbəsi nəticəsində 4 yaşlı qızın yaralandığını açıqlayıb. Məlumata görə, son 24 saat ərzində bölgəyə KAB-lar, artilleriya, minaatanlar, reaktiv yaylım atəş sistemləri və müxtəlif tip PUA-larla zərbələr endirilib.
Son günlər Odessa və Sumı Rusiyanın intensiv hücumlarına məruz qalan əsas şəhərlərdən biri olaraq qalır. Ukrayna rəsmiləri bildirirlər ki, xilasetmə və dağıntıların aradan qaldırılması işləri davam edir, ölən və yaralananların sayı ilə bağlı məlumatlar dəqiqləşdirilir. BMT də iyun ayında Ukraynada mülki itkilərin son dörd ilin ən yüksək aylıq səviyyəsinə çatdığını açıqlayıb.
