2026-cı il dünya çempionatının 1/4 final mərhələsi daha iki gərgin qarşılaşma ilə yekunlaşıb. İngiltərə millisi Norveçi əlavə vaxtda məğlub edərək yarımfinala vəsiqə qazanıb. Günün digər oyununda isə Argentina İsveçrə səddini aşaraq son dörd komanda sırasına yüksəlib.
Beləliklə, turnirin yarımfinalında futbolsevərləri əsl nəhənglərin dueli gözləyir. Argentina İngiltərə ilə, İspaniya isə Fransa ilə üz-üzə gələcək.
Hyustonda keçirilən Norveç – İngiltərə qarşılaşması yüksək temp və dramatik sonluqla yadda qalıb. Skoru ilk açan tərəf Norveç olub. Andreas Şelderup 35-ci dəqiqədə komandasını önə çıxarsa da, Cud Bellinqem ilk hissəyə əlavə olunmuş vaxtda tarazlığı bərpa edib.
Əsas vaxt 1:1 hesabı ilə başa çatdığından qalib əlavə 30 dəqiqədə müəyyənləşib. Burada da sözünü Bellinqem deyib. “Real Madrid”in ulduzu 93-cü dəqiqədə dublunu rəsmiləşdirərək İngiltərəyə 2:1 hesablı qələbə qazandırıb və komandasını yarımfinala yüksəldib.
Argentina azlıqda qalan İsveçrəni əlavə vaxtda məğlub etdi
Kanzas-Sitidə keçirilən Argentina – İsveçrə görüşü də sonadək gərgin mübarizə şəraitində keçib. Matçın əvvəlində Aleksis Makallister hesabı açsa da, ikinci hissədə Dan Ndoye bərabərlik qolunu vuraraq intriqanı yenidən alovlandırıb.
Qarşılaşmanın həlledici anı 72-ci dəqiqədə yaşanıb. İsveçrə hücumçusu Brel Embolo simulyasiyaya görə ikinci sarı vərəqəni alaraq meydandan kənarlaşdırılıb və komandası oyunun qalan hissəsini azlıqda keçirib.
Say üstünlüyündən istifadə edən Argentina əlavə vaxtda üstünlüyünü reallaşdırdı. Əvvəl Hulian Alvares, daha sonra isə Lautaro Martines fərqlənərək Cənubi Amerika təmsilçisinin qələbəsini rəsmiləşdirdi. Lionel Messi bu dəfə qol hesabını artıra bilməsə də, Makallisterin vurduğu ilk qolda məhsuldar ötürmə ilə yadda qaldı.
