Məşhur “Naruto” manqasının ilk Hollivud live-action ekranlaşdırılması üzərində işlər sürətlənir. Lionsgate studiyası filmdə əsas rolları canlandıracaq aktyorları seçmək üçün qlobal kastinqə start verib. İlk mərhələdə seçim Komanda 7-nin üç əsas üzvü – Naruto Uzumaki, Sasuke Uçiha və Sakura Harunonu canlandıracaq namizədlər arasında aparılacaq.
Bu layihə “Naruto” franşizasının tarixində ilk iri büdcəli Hollivud live-action filmi olacaq. İndiyədək Masasi Kişimotonun yaratdığı məşhur əsər yalnız anime serialları, animasiya filmləri və digər ekran layihələri formatında təqdim olunmuşdu. Orijinal manqa isə dünya üzrə 250 milyondan çox nüsxə satılaraq 60-dan artıq ölkə və bölgədə yayımlanıb.
İlk seçim Komanda 7 üçün aparılır
Layihənin rejissoru və ssenari müəllifi Marvel-in “Shang-Chi və On Üzük Əfsanəsi” filminə görə tanınan Destin Daniel Kretton olacaq. O, həmçinin filmin prodüserlərindən biri kimi də çıxış edir. Kastinqin ilk mərhələsində yalnız Naruto, Sasuke və Sakura rolları üçün aktyorlar seçiləcək. Daha sonra Kakasi Hatake və digər əsas personajlar da daxil olmaqla ikinci dərəcəli rollar üçün ayrıca seçim keçiriləcək.
Destin Daniel Kretton layihə barədə danışarkən bildirib:
“Kişimoto-senseinin yaratdığı dünyanı böyük ekrana gətirmək mənim üçün böyük şərəfdir. Dünyanın hər yerindən Komanda 7-ni canlandıracaq aktyorları axtarmaq bizi çox həyəcanlandırır və bu möhtəşəm kainatı birlikdə həyata qaytaracağımıza inanıram.”
Kişimoto: “Hələ də buna inanmaq mənim üçün çətindir”
“Naruto”nun müəllifi Masasi Kişimoto da filmin istehsalı ilə bağlı həyəcanını gizlətməyib. O bildirib ki, əsərinin Hollivud tərəfindən ekranlaşdırılması onun üçün böyük hadisədir və layihəyə Destin Daniel Krettonun rəhbərlik etməsi seçim baxımından ən doğru qərarlardan biridir.
“Hazırda həyatımda bir-birinin ardınca möcüzələr baş verir. ‘Naruto’nun həqiqətən Hollivud filmi olacağına və bunu Destin Daniel Krettonun çəkəcəyinə hələ də tam inana bilmirəm. İndi isə personajlarımı böyük ekranda görəcəyim günü səbirsizliklə gözləyirəm.”
Lionsgate bu layihənin hazırlandığını ilk dəfə 2024-cü ilin fevralında açıqlamışdı. Həmin vaxt studiya Destin Daniel Krettonun həm ssenarini yazacağını, həm də filmi ekranlaşdıracağını rəsmən təsdiqləmişdi. Daha əvvəl layihəyə müxtəlif rejissorlar cəlb olunsa da, istehsal prosesi yalnız son illərdə aktiv mərhələyə keçib.
