2026-cı il dünya çempionatının finalı futbolsevərlərə gərgin və dramatik mübarizə təqdim etdi. Həlledici qarşılaşmada İspaniya millisi son dünya çempionu Argentinanı əlavə vaxtda 1:0 hesabı ilə məğlub edərək tarixində ikinci dəfə dünya çempionu adını qazandı. Qələbə qolunu 106-cı dəqiqədə Ferran Torres vurdu.
Turnir yüksək təşkilatçılığı, dolu tribunaları və möhtəşəm atmosferi ilə yadda qaldı. Mundial boyunca bombardir yarışına xüsusi maraq var idi. Üçüncü yer uğrunda oyundan sonra Kilian Mbappe Lionel Messini dünya çempionatları tarixinin ən məhsuldar bombardiri kimi geridə qoymuşdu. Finalda isə Messi nə qol, nə də məhsuldar ötürmə ilə yadda qalmadı.
İspaniya oyuna nəzarət etdi
Luis de la Fuentenin komandası ilk dəqiqələrdən topa daha çox sahib oldu və hücumlarda üstün görünürdü. Lamin Yamal, Dani Olmo və Mikel Oyarzabal təhlükə yaratmağa çalışsalar da, Emiliano Martines etibarlı çıxışı ilə seçildi. Argentina isə əsas diqqəti müdafiəyə yönəldərək əks-hücumlar üçün fürsət gözlədi.
İkinci hissədə də oyun ssenarisi dəyişmədi. Ferran Torres, Pedri və Kubarsinin cəhdləri nəticəsiz qaldı. Əsas vaxtın sonlarında Enso Fernandes ikinci sarı vərəqəsini alaraq meydandan qovuldu və Argentina matçı 10 nəfərlə davam etdirdi.
Əlavə vaxtda İspaniyanın təzyiqi öz bəhrəsini verdi. Nico Uilyamsın ötürməsindən sonra Ferran Torres 106-cı dəqiqədə hesabı açdı. Qoldan sonra Argentina irəli atıldı. Messi uzaq məsafədən möhtəşəm zərbə ilə hesabı bərabərləşdirməyə yaxın olsa da, top qapının üstündən keçdi. Son dəqiqələrdə cənubi amerikalılar bir neçə təhlükəli hücum qursalar da, hesab dəyişmədi.
Beləliklə, İspaniya 2010-cu ildən sonra ikinci dəfə dünya çempionu oldu, Argentina isə titulunu qoruya bilmədi. Oyunun statistikası da İspaniyanın üstünlüyünü təsdiqlədi: zərbələrdə 20:2, xG göstəricisində isə 1,72-yə qarşı 0,09.
