Avropa İttifaqı Çin texnologiya nəhəngi Alibaba Group-a məxsus AliExpress platformasına qarşı indiyədək Rəqəmsal Xidmətlər Aktı (DSA) çərçivəsində tətbiq edilən ən böyük maliyyə sanksiyasını tətbiq edib. Avropa Komissiyası platformanı qanunsuz, saxta və təhlükəli məhsulların satışının qarşısını lazımi səviyyədə almamaqda təqsirli bilərək 550 milyon avro məbləğində cərimələyib.
Politico nəşrinin məsələ ilə tanış mənbələrə istinadən yaydığı məlumata görə, araşdırma zamanı platformada saxta məhsulların, təhlükəli oyuncaqların və sağlamlıq üçün risk yaradan kosmetik vasitələrin uzun müddət satışda qaldığı müəyyən edilib. Bildirilir ki, bəzi məhsullar standartlara uyğun olmadığı aşkar edildikdən sonra belə istifadəçilərə təklif edilməyə və reklam olunmağa davam edib.
Avropa Komissiyası hansı pozuntuları müəyyən edib?
Avropa Komissiyasının qərarında qeyd olunur ki, AliExpress qanunsuz və təhlükəli malların yayılması risklərini lazımi səviyyədə qiymətləndirməyib və onların qarşısını almaq üçün kifayət qədər effektiv tədbirlər görməyib. Tənzimləyici orqan platformanın məhsul yoxlaması və moderasiya sistemində ciddi çatışmazlıqların olduğunu, eləcə də qanunsuz məhsulların vaxtında silinmədiyini vurğulayıb.
Bu qərar Rəqəmsal Xidmətlər Aktının qüvvəyə minməsindən sonra verilmiş ən yüksək məbləğli cərimə hesab olunur. Bundan əvvəl eyni qanun çərçivəsində digər iri platformalara da sanksiyalar tətbiq edilsə də, onların heç biri bu həcmdə olmayıb.
AliExpress cərimənin məbləğini və qərarın əsaslandırılmasını qəbul etmədiyini bildirib. Şirkət son illərdə risklərin idarə olunması və təhlükəli məhsulların aşkarlanması istiqamətində sistemlərini gücləndirdiyini, qərarı hüquqi baxımdan qiymətləndirdiyini açıqlayıb.
Bununla yanaşı, Avropa Komissiyası platformaya müəyyən edilmiş pozuntuların aradan qaldırılması üçün tədbirlər planı təqdim etməyi tapşırıb. Əks halda şirkət əlavə maliyyə sanksiyaları ilə üzləşə bilər.
