Azərbaycanın Quş Əti və Yumurta İstehsalçıları və İxracatçıları Assosiasiyası ölkəmizin ABŞ-a süfrə yumurtası ixracına başladığını elan edib.
Daylinews-Az xəbər verir ki, ABŞ hökuməti ötən il ölkədə quş qripinin yayılması səbəbindən yaranan yumurta çatışmazlığını və qiymət artımını aradan qaldırmaq üçün xaricdən idxala icazə verib. Bununla əlaqədar olaraq, Azərbaycanın aparıcı quşçuluq müəssisələrindən biri olan “Giləzi Quşçuluq” ABŞ standartlarına uyğun sertifikatlaşmadan keçərək rəsmi ixrac icazəsi əldə edib.
Şirkət artıq bu aydan etibarən ABŞ-a müntəzəm yumurta tədarükünə başlayacaq.
İxrac daxili bazara təsir etməyəcək
Assosiasiya nümayəndələri bildiriblər ki, ABŞ-a ixrac Azərbaycanın daxili yumurta bazarına və qiymətlərə təsir göstərməyəcək.
- Azərbaycanın gündəlik süfrə yumurtası tələbatı təxminən 4 milyon ədəddir, lakin istehsal həcmi 6 milyon yumurtaya çatır.
- Hətta ixrac nəzərə alınsa belə, daxili bazar tam təmin olunur.
- Hazırda ölkədə 100 milyon yumurta ehtiyatı var, bu da daxili bazarın tələbatını tam şəkildə ödəyir.
