ABŞ-ın Los-Anceles şəhərində qeyri-qanuni miqrantlara qarşı sərt tədbirlərə etiraz olaraq başlayan kütləvi iğtişaşlar artıq üçüncü gündür davam edir. Prezident Donald Trampın yeni qərarları fonunda şəhərə iki min nəfərlik Milli Qvardiya qüvvələrinin yeridilməsi siyasi qalmaqala səbəb olub.
Yeni qadağalar və səbəblər
İğtişaşlara səbəb olan əsas amil Trampın ABŞ-a 12 ölkənin vətəndaşlarına girişini qadağan edən sərəncamı olub. Bu ölkələrə əsasən Afrika və Yaxın Şərq dövlətləri – Əfqanıstan, İran, Liviya, Somali, Sudan və digər ölkələr daxildir.
Bundan əlavə, Tramp administrasiyası miqrantlara könüllü şəkildə ölkəni tərk etmələri üçün pul təklif edən “özünüdəportasiya” proqramı elan edib. Bu təşəbbüs, xüsusilə də ABŞ-a döyüş zonalarından gələn qaçqınlar – o cümlədən 200 min ukraynalı və 500 min haitili üçün narahatlıq yaradıb.
Şəhərdə vəziyyət gərgindir
Associated Press-in məlumatına görə, bazar günü səhər saatlarında şəhərdə uzun lüləli silah və qalxanlarla silahlanmış Milli Qvardiya əsgərləri görünməyə başlayıb. The Guardian yazır ki, bu qüvvələr ilk dəfə 1965-ci ildən bəri ştatın razılığı olmadan yerləşdirilib.
Ştat qubernatoru Gevin Nyusom bu addımı “qanunsuz və təhlükəli presedent” adlandıraraq sərt tənqid edib: “Bu, ştatın suverenliyinin ciddi şəkildə pozulmasıdır. Əmr ləğv edilməli, nəzarət Kaliforniyaya qaytarılmalıdır“, – deyə Nyusom bildirib.
Los-Anceles polisi bildirir ki, etirazçılar polislərə beton parçaları, butulkalar atıb və bir sıra yollarda nəqliyyatın hərəkətini dayandırıblar. Alphabet şirkətinə məxsus Waymo avtonom avtomobilləri yandırılıb, şosselər bağlanıb.
Zorakılıq və qarşıdurmalar
Reuters xəbər verir ki, şəhərdə həftəsonu ərzində onlarca etirazçı saxlanılıb. Bir nəfər kokteyl Molotov atdığına, digər şəxs isə motosikletlə polis sırasına çırpıldığına görə həbs edilib.
9News-un jurnalisti Loren Tomasi polis tərəfindən atılan rezin güllə ilə ayağından yaralanıb. Bəzi jurnalistlər də polis və etirazçılar arasında qalmış, zorakılıqla üzləşmişdir.
Trampın cavabı
Tramp sosial şəbəkə Truth Social-da yazıb: “Vaxtilə əzəmətli olan Los-Anceles indi qeyri-qanuni miqrantlar və cinayətkarların hökm sürdüyü məkana çevrilib. Bu xaosa son qoyulacaq. Qanunsuzlar deportasiya ediləcək.”
İlon Mask da Trampı dəstəkləyib və Kaliforniya rəhbərliyini tənqid edib. Mask, vitse-prezident Cey Di Vensin “bu an qəti liderlik tələb edir” mesajını paylaşaraq Trampın mövqeyini gücləndirib.
