Azərbaycan, BMT-nin Ətraf Mühit Proqramının Daimi Nümayəndələr Komitəsi (UNEP CPR) çərçivəsində ilk dəfə UNEP CPR Bürosunun sədri vəzifəsinə seçilib. Daylinews-az.com xəbər verir ki, bu barədə məlumat Azərbaycan Xarici İşlər Nazirliyi tərəfindən yayımlanıb.
Azərbaycan UNEP CPR Bürosuna sədrliyi 2025-2027-ci illəri əhatə edəcək. UNEP CPR, ətraf mühitlə bağlı beynəlxalq məsələlərin prioritetlərini müəyyən edən, BMT-nin Ətraf Mühit Assambleyasının daimi fəaliyyət göstərən əsas orqanıdır. Bu büro, Assambleyanın qlobal ekoloji siyasət və normalar üzrə qərarlarının hazırlanmasında mühüm rol oynayır.
Azərbaycanın BMT-dəki daimi nümayəndəsi və Keniyadakı səfiri Sultan Hacıyev UNEP CPR Bürosunun sədri olaraq ölkəmizi təmsil edəcək.
Azərbaycan və UNEP əməkdaşlığı:
2024-cü ilin noyabrında COP29-a ev sahibliyi edən və ətraf mühitin qorunması və iqlim dəyişiklikləri sahəsində qlobal fəaliyyəti ilə beynəlxalq nüfuz qazanmış Azərbaycan, UNEP-lə əməkdaşlığını dinamik şəkildə inkişaf etdirir.
Azərbaycanın bu sədrliyə seçilməsi və UNEP-in 2026-cı ildə keçiriləcək “Ümumdünya Ətraf Mühit Günü”nə ev sahibliyi etməsi, ölkənin ətraf mühit məsələlərindəki qlobal təşəbbüsləri və nüfuzunu nümayiş etdirir.
