Kanadanın yeni Baş naziri Mark Karni ölkədə növbədənkənar parlament seçkilərinin keçiriləcəyini açıqlayıb. Bu barədə o, milli telekanallar vasitəsilə yayımlanan xüsusi müraciətində bəyan edib.
Karni bildirib ki, general-qubernator Meri Saymonla görüşərək parlamentin buraxılmasını və seçkilərin 28 aprel 2025-ci il tarixində keçirilməsini xahiş edib. Saymon bu təklifi qəbul edib.
Seçkilərin səbəbi: iqtisadi və siyasi böhran
Baş nazirin sözlərinə görə, bu qərarın əsas səbəbi ölkə iqtisadiyyatında mövcud problemlərə dərhal müdaxilə etmək və ABŞ administrasiyasının gömrük-tarif siyasətinə operativ reaksiya vermək zərurətidir. Karni vurğulayıb ki, bu məqsədlə hökumətinə geniş ictimai dəstək lazımdır.
Əslində, parlamentin növbəti iclası martın 24-də planlaşdırılmışdı və ümumi seçkilər isə 20 oktyabr 2025-ci ildə keçirilməliydi. Lakin siyasi reallıqlar prosesin önə çəkilməsinə səbəb olub.
Etimadsızlıq sınağından yayınma cəhdi
Karni martın 9-da istefaya göndərilən sabiq baş nazir və Liberal Partiyanın lideri Castin Trüdonun yerinə hökumət başçısı vəzifəsini icra etməyə başlamışdı. Parlamentin növbəti iclasında Karniyə etimad səsverməsi keçiriləcəyi gözlənilirdi. Lakin liberal partiyanın parlamentdə çoxluğa malik olmaması və müxalifət liderlərinin açıq şəkildə dəstək göstərməyəcəklərini bildirməsi səbəbindən Karni bu sınaqdan keçmək ehtimalının olmadığını bilirdi.
Buna görə də, siyasi təşəbbüsü ələ almaq və ictimai etimadı birbaşa seçkilər vasitəsilə əldə etmək məqsədilə növbədənkənar seçkilər təyin edildi.
Reytinqlər bərabərdir
CBC telekanalının təqdim etdiyi son ictimai rəy sorğusuna görə, hazırda Mark Karninin etimad reytinqi 37,7% təşkil edir. Əsas rəqibi, müxalifətdəki Kanada Mühafizəkarlar Partiyasının lideri Pyer Puolyovra isə cəmi 0,3% fərqlə – 37,4% dəstəyə sahibdir. Bu isə seçkilərin gedişatının və nəticəsinin olduqca gərgin və qeyri-müəyyən olacağını göstərir.
