Bu gün, iyulun 2-də Hollivudun ən məşhur aktrisalarından biri olan Marqo Robbi 36 yaşını qeyd edir. Avstraliyada sadə ailədə böyüyən aktrisa qısa müddətdə dünya kinosunun ən tanınmış simalarından birinə çevrilib. O, həm uğurlu prodüser, həm də LuckyChap Entertainment şirkətinin həmtəsisçisi kimi kino sənayesində mühüm yer tutur.
Maraqlı fakt: Marqo Robbi uşaqlıqdan bəri “Banni” adlı yumşaq oyuncaq dovşanla yatır. Aktrisanın sözlərinə görə, oyuncağı yumaq və ya tikmək hüququ yalnız anasına məxsusdur.
Fermadan Hollivuda uzanan yol
Marqo Elis Robbi 2 iyul 1990-cı ildə Avstraliyanın Dalbi şəhərində anadan olub, uşaqlıq illərini isə Gold Kost bölgəsində keçirib. Atası fermer, anası isə fizioterapevt olub. Məktəbi Somerset College-də bitirən Robbi erkən yaşlarından aktyorluğa maraq göstərsə də, universitetdə teatr təhsili almayıb. Bunun əvəzinə müxtəlif aktyorluq kurslarında və ustad dərslərində iştirak edərək peşəkar bacarıqlarını inkişaf etdirib.
Onun ekran karyerası olduqca maraqlı şəkildə başlayıb. Gənc Marqo məşhur Avstraliya serialı “Neighbours” (“Qonşular”) üçün kastinq agentinə özü zəng edərək dinləmədə iştirak etmək istədiyini bildirib. Nəticədə Donna Fridman obrazını canlandırmaq imkanı qazanıb və bu rol ona iki Logie Awards nominasiyası gətirib.
Uşaqlıq illərində baş verən maraqlı hadisələrdən biri də dayəsi ilə bağlı olub. Aktrisa müsahibələrinin birində bildirib ki, sevimli dayəsi gəlmədiyi üçün anası başqa bir qadın tutmuşdu. Yeni dayəyə etiraz etmək üçün Marqo bədənini ketçupla örtərək bıçağın yanında yerə uzanmış və özünü yaralanmış kimi göstərmişdi. Bu hadisədən sonra həmin dayə bir daha onların evinə qayıtmayıb.
Səkkiz yaşında isə o, sirk məktəbində hava gimnastikası ilə məşğul olmağa başlayıb. Bu idman növü illərlə onun əsas hobbilərindən biri olub və hətta sonradan gimnast haqqında planlaşdırılan, lakin reallaşmayan film layihəsində çəkilmək üçün danışıqlar aparıb.
Böyük ekranın parlaq ulduzuna çevrilməsi
Marqo Robbinin beynəlxalq şöhrəti 2013-cü ildə Martin Skorsezenin “The Wolf of Wall Street” filmi ilə başladı. Leonardo Di Kaprio ilə tərəf-müqabil olduğu ekran işi dünya üzrə təxminən 392 milyon dollar gəlir əldə etdi və aktrisanın Hollivuddakı mövqeyini möhkəmləndirdi.
Bir il sonra o, həyat yoldaşı Tom Akerli və tərəfdaşları ilə birlikdə LuckyChap Entertainment prodüser şirkətini yaratdı. Şirkət son illərdə “Promising Young Woman”, “Saltburn” və “Barbie” kimi uğurlu layihələrin istehsalçısı olub.
2016-cı ildə Marqo “Suicide Squad” filmində Harley Quinn obrazını canlandıraraq populyarlığını daha da artırdı. 2017-ci ildə isə “I, Tonya” filmində fiqurlu konkisürən Tonya Hardinq roluna görə ilk dəfə “Oskar” mükafatına namizəd göstərildi.
2023-cü ildə nümayiş olunan “Barbie” filmi həm kommersiya, həm də mədəni baxımdan ilin ən böyük hadisələrindən biri oldu. Film dünya üzrə 1,4 milyard dollardan çox gəlir əldə etdi və Robbiyə prodüser kimi də böyük uğur qazandırdı. Bundan sonra aktrisa bir müddət aktyorluq fəaliyyətinə fasilə verəcəyini və gələcəkdə rejissorluğa daha çox diqqət ayırmaq istədiyini açıqladı.
Marqo Robbinin ən məşhur filmləri:
- “The Wolf of Wall Street” (2013) – Naomi Lapalya
- “I, Tonya” (2017) – Tonya Hardinq
- “Suicide Squad” (2016) və “Birds of Prey” (2020) – Harley Quinn
- “Once Upon a Time in Hollywood” (2019) – Şeron Teyt
- “Bombshell” (2019) – Kayla Pospisil
- “Mary Queen of Scots” (2018) – Kraliça I Elizabet
- “Babylon” (2022) – Nelli LaRoy
- “Barbie” (2023) – Barbie
- “Wuthering Heights” (2026) – Ketrin Ernşou
Mükafatları və şəxsi həyatı
Marqo Robbi bu günədək nüfuzlu kino mükafatlarında çoxsaylı nominasiyalar və qalibiyyətlər əldə edib.
Onun əsas nailiyyətləri bunlardır:
- “Oskar” – “I, Tonya”, “Bombshell” və prodüser kimi “Barbie” filminə görə 3 nominasiya;
- BAFTA – 5 aktyor və 1 prodüser nominasiyası;
- “Qızıl Qlobus” – “I, Tonya”, “Bombshell”, “Babylon” və “Barbie” filmlərinə görə nominasiyalar;
- AACTA Awards – “Trailblazer Award” və “I, Tonya” filminə görə ən yaxşı aktrisa mükafatı;
- Critics’ Choice Awards – “I, Tonya” və “Suicide Squad” filmlərinə görə qalibiyyət;
- People’s Choice Awards – “Suicide Squad” və “Barbie” filmlərinə görə mükafatlar;
- MTV Movie Awards – “The Wolf of Wall Street” filmində ilin kəşfi və “Birds of Prey” filmində ən yaxşı döyüş səhnəsi.
Marqo gələcək həyat yoldaşı Tom Akerli ilə 2013-cü ildə “Suite Française” filminin çəkilişlərində tanış olub. Bir il sonra onlar bir neçə dostları ilə birlikdə eyni evdə yaşamağa başlayıblar. Cütlük 2016-cı ildə ailə qurub, 2024-cü ilin oktyabrında isə ilk övladları – oğulları dünyaya gəlib.
Dünya şöhrəti qazanmasına baxmayaraq, aktrisa sadə vərdişlərini qoruyub saxlayır. O, hələ də uşaqlıq oyuncağı “Banni” ilə yatır və onu yalnız anasının yumasına icazə verir. Bundan başqa, Marqo buz xokkeyinin böyük azarkeşidir və New York Rangers klubunu dəstəkləyir. Avstraliyada buz meydançalarının az olması səbəbindən isə uşaqlıqda əsasən otüstü xokkey oynayıb.
