Azərbaycanda peşə təhsili ilə bağlı yeni dəyişikliklər gözlənilir. Hazırda peşə təhsili üzrə yeni təsnifat layihəsi hazırlanır və bəzi ixtisasların qəbuldan tamamilə çıxarılması nəzərdə tutulur.
Daylinews-az.com xəbər verir ki, bu barədə Peşə Təhsili üzrə Dövlət Agentliyinin direktoru Ceyhun Kərəmov, peşə təhsili ilə bağlı keçirilən brifinqdə danışıb.
Direktorun sözlərinə görə: “Bu layihənin reallaşdırılması nəticəsində yeni ixtisaslar üzrə qəbul həyata keçiriləcək, lakin müəyyən sahələr üzrə qəbul tamamilə dayandırılacaq.”
Ceyhun Kərəmov qeyd edib ki, sənətkarlıq sahəsinə aid bəzi ixtisaslara maraq çox azdır və məhz buna görə də həmin ixtisasların ləğv edilməsi gündəmdədir. Onun açıqlamasına əsasən, tələbatın az olması bəzi istiqamətlərin tədris planından çıxarılması ilə nəticələnəcək. Eyni zamanda, bəzi ixtisasların adlarının dəyişdirilməsi də nəzərdən keçirilir.
Kərəmov əlavə edib ki, hansı ixtisaslara qəbulun dayandırılacağı və hansıların yenilənəcəyi barədə məlumat 2026-cı ilin ilk rübündə ictimaiyyətə təqdim olunacaq.
