2025-2026-cı tədris ili üçün ümumi təhsil müəssisələrinin I sinfinə üzrlü səbəbdən gecikmiş uşaqlar üçün elektron qəbul prosesi yenidən aktivləşdirilib. Məktəbəqədər və Ümumi Təhsil üzrə Dövlət Agentliyinin məlumatına əsasən, qeydiyyat prosesi 8 oktyabr saat 15:00-dan başlayaraq 15 oktyabr saat 18:00-dək davam edəcək.
Bu müddət ərzində valideynlər boş qalan yerlərə uyğun olaraq məktəb və müəllim seçimini edə biləcəklər. Övladını məktəbə qəbul etdirmək istəyən valideynlər, qeyd olunan müddət ərzində mektebeqebul.edu.az saytında sorğu yerləşdirərək, müvafiq sənədlərlə məktəbə yaxınlaşaraq qeydiyyatı tamamlaya bilərlər.
Qeyd etmək lazımdır ki, cari tədris ilində artıq 130 mindən çox uşaq I sinfə qəbul olunub. Elektron qəbulun yenidən açılması gecikmiş uşaqlar üçün əhəmiyyətli imkan yaradacaq.
