Azərbaycan Prezidenti İlham Əliyevin Türk Dövlətləri Təşkilatında (TDT) üzv ölkələrin birgə hərbi təlimlər keçirməsi təklifi reallaşarsa, potensial təhdidlərə “yalnız deyilik” siqnalı göndərəcək.
Yücel Karauzun qiymətləndirməsi
Türkiyənin Azərbaycandakı keçmiş hərbi attaşesi, general Yücel Karauz bildirir ki, İlham Əliyevin təklifi TDT-yə taktiki, strateji, siyasi və geosiyasi faydalar gətirəcək: “Birgə təlimlər komanda-nəzarət uyğunluğunu gücləndirəcək, quru, hava, dəniz və xüsusi qüvvələrin inteqrasiyasını inkişaf etdirəcək. Regional böhranlarda reaksiya vaxtını azaldacaq”.
Azərbaycan və Türkiyənin Qarabağ, Suriya, İraq, hibrid müharibə və PUA təcrübəsi digər üzvlər üçün praktiki dərs olacaq. “Təlimlər təhdidlərə ‘yalnız deyilik’ mesajı verəcək, təhlükəsizlik balansını dəyişəcək, xarici güclər üçün risk qiymətini qaldıracaq. NATO olmadan regional təhlükəsizlik çətiri yaradacaq”.
Təhlükəsizlik sahələri və iqtisadi faydalar
Karauz qeyd edir ki, təlimlər sərhəd mühafizəsi, terrorizm, separatizm, kibertəhlükəsizlik, informasiya müharibəsi, enerji-nəqliyyat xətləri qorunmasında ortaq anlayış formalaşdıracaq: “Ortaq silah istifadəsini təşviq edəcək, Türkiyə müdafiə sənayesinin TDT-də yayılmasını sürətləndirəcək, gələcəkdə birgə istehsala yol açacaq. TDT geosiyasi çəkisini artıracaq, təhlükəsizlik platformasına çevriləcək”.
Təlimlər liderlər və Baş Qərargahlar arasında etimadı gücləndirəcək, böhranlarda qərarları sürətləndirəcək: “Hərbi hazırlığı yüksəldəcək, müdafiəni möhkəmləndirəcək, Türk dünyasını regional təhlükəsizlik qüvvəsinə çevirəcək”.
İlham Əliyevin Qəbələ təklifi
Prezident İlham Əliyev Qəbələ Zirvəsində deyib: “Təklif etdim ki, bu il Azərbaycanda üzv ölkələrin birgə hərbi təlimləri keçirilsin. Hesab edirəm ki, buna ehtiyac var. Biz ikitərəfli təlimlər keçiririk, ən çox Türkiyə ilə. Birgə təlimlər rəmzi və praktiki əhəmiyyət daşıyacaq”.
