Prezident İlham Əliyevin sərəncamı ilə təsdiq edilmiş “Azərbaycan Mədəniyyəti – 2040” Konsepsiyası Azərbaycanın mədəni sahəsində uzunmüddətli strategiyanı müəyyən edir.
Bu sənədə əsasən, mədəniyyətin sistemli inkişafı üçün 6 prioritet dövlət proqramının layihələri hazırlanacaq. Konsepsiya milli-mənəvi dəyərlərin qorunması, müasir mədəniyyət modelinin qurulması və dayanıqlı irəliləyiş məqsədlərini daşıyır.
Proqramların siyahısı və prioritetləri
Konsepsiyada göstərilən dövlət proqramları aşağıdakılardır:
- Azərbaycan dilinin və ədəbiyyatının inkişafı ilə bağlı dövlət proqramı;
- Azərbaycanın mədəni və təbii irsinin qorunması ilə bağlı dövlət proqramı;
- İncəsənətin inkişafı ilə bağlı dövlət proqramı;
- Audiovizual sənayenin inkişafı ilə bağlı dövlət proqramı;
- Davranış mədəniyyətinin və bilgi mədəniyyətinin inkişafı ilə bağlı dövlət proqramı;
- Mədəni və yaradıcı sənayenin inkişafı ilə bağlı dövlət proqramı.
Bu proqramlar Konsepsiyanın üç mərhələsində həyata keçiriləcək: birinci – 2026-2030-cu illər; ikinci – 2031-2035-ci illər; üçüncü – 2036-2040-cı illər. Hər mərhələdə xüsusi tədbirlər planı tərtib oluna bilər.
Konsepsiyanın strateji hədəfləri
Konsepsiyanın əsas məqsədlərindən biri Azərbaycanın tarixi coğrafiyasına mədəni qayıdışı, məhvətodulmuş və dağıdılmış tarixi-mədəni irsinin bərpasıdır. Azərbaycan dilinin regional rolunun gücləndirilməsi və birləşdirici amil kimi təsiri ön plandadır.
Təşkilatlaşdırılmış mədəni iştirakçılıq regional maraqların mühafizəsində və qonşu ölkələrlə dostluq əlaqələrinin inkişafında vacib rol oynayacaq.
Mədəniyyət Nazirliyi proqramların əlaqələndirilməsini təmin edəcək, icra vəziyyəti barədə Prezidentə illik məlumat verəcək.
Monitorinq İqtisadi İslahatların Təhlili və Kommunikasiya Mərkəzi tərəfindən aparılacaq. Son 20 ildə xaricdən qaytarılmış 36 əhəmiyyətli eksponat kimi nailiyyətlər irs qorunmasının uğurunu təsdiqləyir.
