Dünyanın ən böyük video platformalarından biri olan YouTube-un tarixində xüsusi yer tutan ilk paylaşım artıq muzey eksponatına çevrilib.
Londonda fəaliyyət göstərən Victoria and Albert Museum (V&A) platformaya 23 aprel 2005-ci ildə yüklənmiş ilk videonu öz kolleksiyasına daxil edib. Söhbət YouTube-un həmtəsisçisi Cavid Kərim tərəfindən paylaşılan və cəmi 19 saniyə davam edən “Me at the zoo” adlı videodan gedir.
Görüntülər ABŞ-ın San-Dieqo zooparkında, fillərin fonunda çəkilib. Sadə məzmununa baxmayaraq, bu video internet mədəniyyətində dönüş nöqtəsi hesab olunur. Hazırda həmin paylaşım 382 milyondan çox baxış və 18 milyondan artıq bəyənmə toplayıb.
Rəqəmsal irsin qorunması
Muzeyin rəqəmsal arxiv komandası bununla kifayətlənməyib. 8 dekabr 2006-cı il tarixli YouTube səhifəsinin dizaynı və istifadəçi interfeysi də yenidən bərpa edilib. Bu proses təxminən 18 ay davam edib və platformanın istifadəçi təcrübəsi komandası, həmçinin Londonda yerləşən dizayn studiyası ilə birgə həyata keçirilib.
V&A nümayəndələri bildiriblər ki, layihə internet və rəqəmsal dizayn tarixində mühüm mərhələni qorumağa xidmət edir. YouTube rəhbərliyi isə bu təşəbbüsün qlobal miqyasda mədəni fenomenə çevrilmiş platformanın başlanğıc nöqtəsini nümayiş etdirdiyini vurğulayıb.
“Me at the zoo” videosu hazırda V&A South Kensington məkanındakı “Design 1900-Now” qalereyasında nümayiş olunur. Yenidənqurma və arxivləşdirmə prosesi ilə bağlı əlavə materiallar isə Stratford ərazisində yerləşən V&A East Storehouse-da ziyarətçilərə təqdim ediləcək.
