Paytaxtda nəqliyyat sıxlığını azaltmaq məqsədilə yeni infrastruktur layihələri həyata keçiriləcək. “2025–2030-cu illər üçün Bakı şəhərində nəqliyyat infrastrukturunun inkişafına dair Dövlət Proqramı” çərçivəsində üç strateji avtomobil yolunun inşası planlaşdırılıb.
Artan urbanizasiya və əhali sıxlığı səbəbindən xüsusilə paytaxtətrafı ərazilərdən şəhərə yönələn nəqliyyat axını ciddi problemlər yaradır. Alternativ marşrutların azlığı isə sürücüləri mərkəzi yollardan istifadə etməyə məcbur edir.
Layihələrin əsas məqsədi
Yeni yolların tikintisində əsas hədəf sürücülərin şəhər mərkəzinə daxil olmadan müxtəlif istiqamətlərə rahat və fasiləsiz hərəkətini təmin etməkdir. Bu yanaşma mərkəzi küçələrdəki yükü azaltmağa kömək edəcək.
İnşa ediləcək əsas yollar bunlardır:
- Bilgəh – Novxanı – Xırdalan – M4 avtomobil yolu
- Sabunçu – Sulutəpə dairəvi avtomobil yolu
- Bakı Dairəvi-1 yolu ilə Ziya Bünyadov prospektini birləşdirən yol
Gediş-gəlişdə hansı dəyişikliklər olacaq?
Bu layihələr sayəsində bir sıra istiqamətlər üzrə hərəkət xeyli sadələşəcək. Məsələn, regionlardan Bilgəhə gedən sürücülər artıq şəhərə daxil olmadan birbaşa marşrutdan istifadə edə biləcəklər. Eyni zamanda, Sulutəpədən aeroport istiqamətinə hərəkət edən nəqliyyat üçün də alternativ yol formalaşacaq.
Bakı Dairəvi-1 yolunun tamamlanması isə xüsusilə “20 Yanvar” dairəsi və əsas magistrallardakı sıxlığı azaltmağa imkan verəcək. Bu, Xırdalan və Sumqayıt istiqamətindən gələn avtomobillərin hərəkətini də xeyli rahatlaşdıracaq. Hazırda Bilgəh-M4 avtomobil yolunun tikintisi davam edir.
Təxminən 29 kilometr uzunluğunda və altı zolaqlı olacaq bu magistralın 2027-ci ildə istifadəyə verilməsi planlaşdırılır. Ümumilikdə, nəzərdə tutulan bu layihələr Bakıda nəqliyyat axınının daha düzgün bölüşdürülməsinə və tıxacların azalmasına mühüm töhfə verəcək.
