Bu gün müasir kinonun ən fərqli və cəsarətli rejissorlarından biri sayılan Kventin Tarantino 63 yaşını qeyd edir. Videokasset mağazasında işləyən sadə bir gəncin dünya kinosunun simasına çevrilməsi hekayəsi hələ də milyonlarla insanı ilhamlandırır. Onun filmləri uzun dialoqlar, qeyri-xətti süjet quruluşu və yadda qalan səhnələrlə dərhal seçilir.
Videoprokatdan böyük kinoya uzanan yol
Tarantino klassik kino təhsili almayan nadir rejissorlardandır. O, universitet əvəzinə Kaliforniyada videoprokat mağazasında işləməyi seçib. Gənc yaşlarından yüzlərlə film izləyərək fərqli janrları dərindən öyrənib və bu, onun özünəməxsus üslubunun formalaşmasına təsir göstərib.
Məhz bu təcrübə onun yaradıcılığında müxtəlif elementlərin – Asiya döyüş filmləri, Avropa art-hausu və Amerika kriminal dramlarının sintezini yaratdı. Tarantino dəfələrlə bildirib ki, onun üçün “ən yaxşı kino məktəbi filmlərin özüdür”.
“Kriminal qiraət” və kino tarixində dönüş nöqtəsi
Rejissorun dünya şöhrəti qazanmasına səbəb olan əsas layihə Pulp Fiction oldu. Film qeyri-adi süjet quruluşu və personajların dərin dialoqları ilə kino sənayesində yeni mərhələ açdı.
Tarantinonun israrı ilə baş rola dəvət edilən John Travolta uzun fasilədən sonra yenidən məşhurluq qazandı və “Oskar” nominasiyasına layiq görüldü. Bu seçim rejissorun riskə getməkdən çəkinmədiyini göstərdi.
Onun digər məşhur işləri arasında Kill Bill, Inglourious Basterds və Django Unchained xüsusi yer tutur. Bu filmlərdə Tarantino həm janrları birləşdirir, həm də tarixi hadisələrə fərqli yanaşma təqdim edir.
Rejissorun maraqlı xüsusiyyətlərindən biri də vizual detallara olan xüsusi diqqətidir. Onun filmlərində tez-tez təkrarlanan kadr həlləri və estetik elementlər artıq onun “imzasına” çevrilib.
Tarantino uzun illərdir ki, cəmi 10 film çəkəcəyini bildirir. Artıq doqquz layihəni tamamlayan rejissor son filmi üzərində işlədikdən sonra kinematoqrafiyadan uzaqlaşmağı planlaşdırır və gələcəkdə daha çox yazıçılıqla məşğul olmaq niyyətindədir.
