Yaxın Şərqdə davam edən gərginlik və Hörmüz boğazı ətrafında yaranmış risklər fonunda Yaponiya Azərbaycandan ilk dəfə yeni neft partiyası qəbul edib. Yaponiyanın ən böyük enerji şirkətlərindən olan ENEOS üçün nəzərdə tutulan tanker mayın 12-də ölkə limanına çatıb.
Məlumata görə, tanker vasitəsilə daşınan təxminən 283 min barel Azərbaycan nefti Tokio yaxınlığında yerləşən Neqisi neft emalı zavoduna göndəriləcək. Yaponiya tərəfi son aylarda enerji təhlükəsizliyi ilə bağlı alternativ mənbələrin genişləndirilməsinə xüsusi diqqət ayırır.
Yaponiya enerji idxalını şaxələndirir
Rəsmi məlumatlarda bildirilir ki, Tokio hökuməti Hörmüz boğazından asılılığı azaltmaq üçün yeni təchizat marşrutları üzərində fəal işləyir. Bu məqsədlə təkcə Azərbaycandan deyil, ABŞ və digər regionlardan da neft alışları artırılır.
Ekspertlərin fikrincə, Yaxın Şərqdə uzunmüddətli qeyri-sabitlik enerji bazarında əlavə risklər yaradır. Məhz buna görə Yaponiya neft idxalında müxtəlif ölkələrlə əməkdaşlığı genişləndirməyə çalışır. Azərbaycan neftinin ölkəyə çatdırılması da bu strategiyanın bir hissəsi hesab olunur.
Qeyd edilir ki, münaqişə başlamazdan əvvəl Yaponiya neft idxalının böyük hissəsini Yaxın Şərq ölkələri hesabına təmin edirdi. Hörmüz boğazı ilə bağlı yaranan təhlükələrdən sonra isə alternativ mənbələr daha aktual mövzuya çevrilib.
Hazırda Yaponiyada gündəlik neft istehlakı təxminən 3 milyon barel təşkil edir. Ölkə həm dövlət, həm də özəl sektor ehtiyatlarını birləşdirən böyük strateji enerji rezervlərinə malikdir. Bu ehtiyatların bir neçə aylıq daxili tələbatı qarşıladığı bildirilir.
Bununla belə, ekspertlər hesab edir ki, Yaxın Şərqdə böhranın uzun müddət davam etməsi idxal təhlükəsizliyi ilə bağlı narahatlıqları artırır. Bu səbəbdən Azərbaycan kimi etibarlı tərəfdaşlarla əməkdaşlıq Yaponiya üçün daha böyük əhəmiyyət qazanmağa başlayıb.
