Bakının Qaradağ rayonunun Lökbatan qəsəbəsində yerləşən anbarda baş vermiş güclü yanğın tamamilə söndürülüb. Fövqəladə Hallar Nazirliyinin yaydığı məlumata görə, bir neçə saat davam edən intensiv müdaxilədən sonra alovun yayılmasının qarşısı tam alınıb və ərazidə soyutma işləri yekunlaşdırılıb.
Yanğın mayın 12-si səhər saatlarında müxtəlif təyinatlı malların saxlanıldığı böyük anbar kompleksində başlamışdı. Hadisə yerinə dərhal çoxsaylı yanğınsöndürmə briqadaları, xüsusi texnikalar və aviasiya qüvvələri cəlb olunmuşdu. Nazirlik bildirir ki, əməliyyatda ümumilikdə 182 nəfər şəxsi heyət, 40 xüsusi texnika və 2 helikopter iştirak edib.
Rəsmi məlumata əsasən, ümumi sahəsi 46 min kvadratmetr olan bir-birinə bitişik anbar kompleksinin 21 min kvadratmetrlik hissəsi yanaraq yararsız hala düşüb. Qalan ərazi isə operativ müdaxilə nəticəsində alovdan mühafizə olunub.
Hadisə zamanı anbarda fərqli təyinatlı məhsulların saxlanıldığı qeyd edilir. İlkin məlumatlara görə, yanğın nəticəsində xəsarət alan olmayıb. Hazırda hadisənin başvermə səbəbləri araşdırılır.
Lökbatanda baş verən yanğın son dövrlərin ən böyük sənaye tipli hadisələrindən biri hesab olunur. Güclü tüstü və alov səbəbindən əraziyə giriş məhdudlaşdırılmış, təhlükəsizlik tədbirləri gücləndirilmişdi. Helikopterlərin cəlb olunması isə alovun geniş əraziyə yayılmasının qarşısını almaqda mühüm rol oynayıb.
