Ümumdünya Səhiyyə Təşkilatı (ÜST) hantavirusla bağlı beynəlxalq xəbərdarlıq edərək yaxın həftələrdə yeni yoluxma hallarının arta biləcəyi ehtimalını açıqlayıb. Təşkilatın rəhbəri Tedros Adhanom Qebreyesus Madrid şəhərində keçirdiyi mətbuat konfransında bildirib ki, hazırda vəziyyət qlobal epidemiya səviyyəsində qiymətləndirilməsə də, virusun uzun inkubasiya müddəti əlavə risk yaradır.
Onun sözlərinə görə, bəzi yoluxmaların gec aşkarlanması yeni halların ortaya çıxmasına səbəb ola bilər. Qebreyesus beynəlxalq ictimaiyyəti diqqətli olmağa çağıraraq monitorinq tədbirlərinin gücləndirilməsinin vacibliyini vurğulayıb.
Yoluxmalar kruiz gəmisində qeydə alınıb
Məlumata əsasən, Hollandiya bayrağı altında fəaliyyət göstərən “MV Hondius” adlı kruiz gəmisi aprelin əvvəlində Argentinanın Uşuaya limanından səfərə çıxıb. Səyahət zamanı bir neçə sərnişində hantavirus əlamətləri müşahidə olunub. Sonradan virus səbəbindən üç nəfərin həyatını itirdiyi açıqlanıb.
Yoluxma halları müxtəlif ölkələrdə, o cümlədən İspaniya, Fransa və ABŞ-də təsdiqlənib. ÜST mayın 2-də gəmidə hantavirus hallarının rəsmi şəkildə müəyyənləşdirildiyini bildirib. Bundan sonra İspaniya tərəfi ilə aparılan danışıqlar nəticəsində gəminin Tenerife adasına istiqamətləndirilməsi və sərnişinlərin təxliyəsi qərara alınıb.
Mütəxəssislər qeyd edirlər ki, hantavirus əsasən gəmiricilər vasitəsilə yayılır və virus hissəcikləri havaya qarışdıqda insan orqanizminə daxil ola bilər.
Hantavirusun əsas simptomları hansılardır?
Həkimlərin sözlərinə görə, xəstəlik ilkin mərhələdə adi qripə bənzər simptomlarla başlayır. Lakin bəzi hallarda ağır fəsadlara səbəb ola bilər.
Ən çox rast gəlinən simptomlar:
- yüksək hərarət və halsızlıq
- əzələ ağrıları və nəfəs darlığı
- böyrək problemləri və daxili qanaxma
- tənəffüs çatışmazlığı
ÜST və digər səhiyyə qurumları xüsusilə riskli bölgələrdə gigiyena qaydalarına əməl etməyi, gəmiricilərlə təmasdan uzaq durmağı və şübhəli simptomlar yaranarsa dərhal tibbi yardıma müraciət etməyi tövsiyə edir.
